ભરૂચ જિલ્લામાં નશાનો વેપલો કરતા તત્વો અવનવા હથકંડા અપનાવીને પણ પોતાના નાપાક મનસુબા પાર પાડતા હોય છે, જિલ્લામાં ચાલુ વર્ષે જ અનેક સ્થળે પાડવામાં આવેલ પોલીસના સફળ દરોડાઓમાં લાખોની કિંમતનો ભારતીય બનાવટનો વિદેશી શરાબ ઝડપાઈ ચુક્યો છે, ત્યારે હજુ પણ કેટલાક તત્વો નશાનો વેપલો પોલીસને હાથ તાળી આપી ધમધમાવી રહ્યા હોવાનું સામે આવી રહ્યું છે.
અંકલેશ્વરના સારંગપુર ગામ પાસેના તળાવ નજીક જમીનમાં ખાડો ખોદી કેરબામાં ભારતીય બનાવટના વિદેશી શરાબનો જથ્થો સંતાડવામાં આવ્યો હતો, જે બાદ પોલીસને મળેલ ચોક્કસ બાતમીના આધારે સ્થળ ઉપર જઈ તપાસ કરતા બુટલેગરોના કારનામા સામે આવ્યા હતા, જ્યાં પોલીસે જમીન ખોદી કેરબો કાઢતા તેમાંથી એક બાદ એક અનેક દારૂની બોટલો નીકળતા ઉપસ્થિત લોકો ચોંકી ઉઠયા હતા.
હાલ મામલે અંકલેશ્વર પોલીસે હજારોની કિંમતના ભારતીય બનાવટના વિદેશી શરાબનો જથ્થો કબ્જે કરી મામલે બુટલેગરને વોન્ટેડ જાહેર કરી વધુ તપાસ હાથધરી છે.
