ગાંધીનગરના રતનપુર ગામમાં SOG એ મોટી કાર્યવાહી કરી છે. ગામની સીમમાં આવેલી એક ઓરડીમાં રાધણ ગેસના સિલિન્ડરોનો સંગ્રહ કરી ગેરકાયદેસર રીતે વેચાણ કરતા કરિયાણાના બે વેપારીઓને SOG એ ઝડપી લીધા હતા. તેમની પાસેથી પોલીસે રૂ. 41,600 ની કિંમતના 16 નંગ ગેસ સિલિન્ડર જપ્ત કરી કાયદેસરની કાર્યવાહી હાથ ધરી છે.
SOG ની ટીમને પેટ્રોલિંગ દરમિયાન બાતમી મળી હતી કે, રતનપુર ગામની સીમમાં આવેલી એક ઓરડીમાં વૈદ કિરાણા સ્ટોર નામની દુકાન ધરાવતા રજનીકાંત પટેલ અને હિંમતરામ કુમાવત ગેરકાયદેસર રીતે ગેસ સિલિન્ડરો રાખીને તેનું વેચાણ કરે છે. આથી એસઓજીએ બાતમીના આધારે ઘટના સ્થળે દરોડો પાડ્યો હતો અને ગેસના 16 સિલિન્ડર જપ્ત કર્યાં હતા, જેની કિંમત આશરે રૂ. 41 હજરા 600 જેટલી થાય છે.
આ કાર્યવાહી હેઠળ પોલીસે રજનીકાંત અને હિંમતરામની ધરપકડ પણ કરી હતી. આરોપીઓની પૂછપરછમાં ઓરડી શાહપુર ગામના દશરથભાઇ પટેલ પાસેથી બંનેએ ભાડે રાખી હોવાની કબૂલાત કરી હતી. આ મામલે પોલીસે બંને આરોપી સામે ગુનો નોંધીને આગળની કાર્યવાહી હાથ ધરી છે.
