ભરૂચ :
દેશની સુરક્ષા અને કાયદો-વ્યવસ્થા જાળવવાની ફરજ દરમિયાન પોતાના પ્રાણ ન્યોછાવર કરનારા પોલીસ જવાનોના બલિદાનને યાદ કરવા ભરૂચમાં 21 ઓક્ટોબરના રોજ પોલીસ સ્મૃતિ દિનની ઉજવણી કરવામાં આવી હતી. કાળી તલાવડી સ્થિત પોલીસ પરેડ ગ્રાઉન્ડ ખાતે આવેલા શહીદ સ્મારક પર શહીદ પોલીસ જવાનોને ભાવભીની શ્રદ્ધાંજલિ અર્પણ કરવામાં આવી હતી.
ભરૂચ જિલ્લા પોલીસ હેડક્વાર્ટર ખાતે યોજાયેલા આ કાર્યક્રમમાં જિલ્લા પોલીસ અધિક્ષક અક્ષયરાજ મકવાણા, ભરૂચના ધારાસભ્ય રમેશ મિસ્ત્રી સહિત પોલીસ અધિકારીઓ અને કર્મચારીઓ ઉપસ્થિત રહ્યા હતા. ઉપસ્થિત મહાનુભાવોએ શહીદ પોલીસ જવાનોના શૌર્ય, સમર્પણ અને બલિદાનને યાદ કરી શહીદ સ્મારક પર પુષ્પાંજલિ અર્પણ કરી હતી. આ પ્રસંગે દેશની સુરક્ષા અને નાગરિકોની સલામતી માટે ફરજ બજાવતાં શહીદ થયેલા જવાનો પ્રત્યે આદર અને કૃતજ્ઞતાની લાગણી વ્યક્ત કરવામાં આવી હતી.
ઉલ્લેખનીય છે કે, દર વર્ષે 21 ઓક્ટોબરના રોજ પોલીસ સ્મૃતિ દિન મનાવવામાં આવે છે. વર્ષ 1959માં લદ્દાખના હોટ સ્પ્રિંગ્સ વિસ્તારમાં ચીની સૈનિકો સાથેની અથડામણમાં શહીદ થયેલા 10 પોલીસ જવાનોની સ્મૃતિમાં આ દિવસની ઉજવણી શરૂ કરવામાં આવી હતી.
પોલીસ સ્મૃતિ દિન નિમિત્તે દેશની આંતરિક સુરક્ષા, કાયદો-વ્યવસ્થા અને નાગરિકોની સલામતી માટે ફરજ દરમિયાન શહીદ થયેલા પોલીસકર્મીઓના શૌર્ય અને બલિદાનને યાદ કરવામાં આવે છે. ભરૂચમાં યોજાયેલા કાર્યક્રમમાં પણ શહીદ જવાનોના અતુલ્ય યોગદાનને નમન કરી તેમની સ્મૃતિને વંદન કરવામાં આવ્યું હતું.
