છેલ્લા કેટલાય દિવસોથી પતંગ રસિયાઓ ઉત્તરાયણની રાહ જોઈ રહ્યા હોય છે. જયારે ઉત્તરાયણના તહેવારને હવે માત્ર આંગળીઓના તેળવે ગણી શકાય એટલા જ દિવસો બાકી રહ્યા છે ત્યારે ઉત્તરાયણ ટાણે બજારોમાં પતંગ રસિયાઓની પાંખી હાજરીને લઈ આમોદનાં વેઓરીઓ ગ્રાહકોની અછત સેવી રહ્યા છે.
આમોદનાં વેપારીઓ દ્વારા પતંગનાં તેમજ દોરીઓનાં ઢગલે ઢગલા ઠેર-ઠેર આમોદનાં બજારમાં જોવા મળી રહ્યા છે પરંતુ ખરીદી માટે ગ્રાહકોની પાંખી હાજરીને પગલે વેપારીઓમાં ચિંતાનું મોજુ છવાઈ જવા પામ્યુ છે.
પતંગ દોરીની દુકાન ધરાવતા વેપારીઓ સાથે વાત કરતા જાણવા મળયુ હતું કે કોરોનાની મહામારીને કારણે ગત વર્ષ કરતા આ વર્ષે ખરીદી કરવા આવતા ગ્રાહકોની સંખ્યામાં વ્યાપક ઘટાડો જોવા મળી રહ્યો છે. ઉત્તરાયણના તહેવારને હવે ગણતરીના દિવસો જ બાકી રહ્યા છે ત્યારે ઘરાકી ન હોવાના કારણે વેપારીઓ મુંઝવણમાં મુકાયા હતા. જયારે ઉત્તરાયણનો દિવસ નજીક આવશે તેમ તેમ ખરીદીમાં તેજી આવશે એવી વેપારીઓ આશા સેવી રહ્યા છે.
