બોડેલી તાલુકાના જબુગામ બસ સ્ટેન્ડ નજીક બે ઈક્કો ગાડી વચ્ચે અકસ્માત સર્જાયો હતો. જેમાં એક ઈકોના ચાલકને ગંભીર ઈજાઓ પહોંચતા બોડેલીની ખાનગી હોસ્પિટલમાં સારવાર અર્થે ખસેડાયો હતો. આ સંદર્ભે જબુગામ પોલીસ મથકે ફરિયાદ થવા પામી હતી. પ્રાપ્ત માહિતી મુજબ રાષ્ટ્રીય ધોરી માર્ગ નં. 56 પર બે ઈક્કો ગાડી વચ્ચે રાતના સુમારે અકસ્માત સર્જાયો હતો. જેમાં મધ્યપ્રદેશના બાપુસીગ જોટડીયાભાઈ રાવરીયા પાવાગઢ મહાકાળી માતાજીના દર્શન કરી પોતાના વતન જોબટ (એમ.પી) પોતાની ઈક્કો ગાડી લઈને જઈ રહ્યો હતો.
ત્યારે રાતના સુમારે બીજી એક નંબર વિનાની ઈક્કો કારનો ચાલક પૂરપાટ ઝડપે અને ગફલત ભરી રીતે હંકારી ઓવરટેક કરી રોંગ સાઈડ સાથે બંને ઈક્કો વચ્ચે અકસ્માત સર્જાયો હતો. બંને ગાડીના આગળના ભાગને ભારે નુકસાન થયું હતું. સદનસીબે કોઇ જાનહાનિ થવા પામી ન હતી. જેમાં એમપીના ગાડી ચાલકને ગંભીર ઇજાઓ પહોંચતા તેને સારવાર માટે બોડેલીની ખાનગી હોસ્પિટલમાં ખસેડવામાં આવ્યો હતો. જ્યારે બીજી ગાડીનો ચાલક સ્થળ પર જ ગાડી છોડી ભાગી ગયો હતો. બનાવ અંગેની જબુગામ પોલીસ મથકે ફરીયાદ થતાં જબુગામ પોલીસ મથકના જમાદાર ભરતભાઈએ જરૂરી આગળની કાયદેસરની કાર્યવાહી હાથ ધરી છે.
ફૈજાન ખત્રી કલારાણી જિ.છોટાઉદેપુર
