ભરૂચ જિલ્લાના ઝઘડિયા તાલુકામાં ફરી એકવાર વાહન ચોરો સક્રિય થયા હોય એમ તાજેતરમાં કેટલાક સ્થળોએ વાહનચોરીની ઘટનાઓ બનતી દેખાઇ રહી છે.
મળતી વિગતો મુજબ ઝઘડિયા તાલુકાના લીમોદરા ગામે રહેતા કાલિદાસ ઝવેરભાઈ વસાવા ગતરોજ તેમની પુત્રવધૂની ખબર લેવા માટે ઝઘડિયા સેવારૂરલ દવાખાના ખાતે આવ્યા હતા. તેમણે તેમની બાઈક ટાવર રોડ પર હાઇસ્કૂલની સામે પાર્ક કરીને હોસ્પિટલમાં ગયા હતા. તેઓ હોસ્પિટલમાંથી અડધો કલાક બાદ પરત આવતાં તેમની પાર્ક કરેલી જગ્યાએ બાઇક હતી નહીં. આજુબાજુમાં તપાસ કરતાં તેમની બાઇક મળી ન હતી, તેથી તેમણે ઝઘડિયા પોલીસ મથકમાં બાઈક ચોરીની ફરિયાદ નોંધાવી હતી. ગતરોજ તાલુકામાંથી બે ઇકો કારની ઉઠાંતરી થયાના ચોવીસ કલાક દરમિયાન જ આ બાઇક ચોરીની ઘટના પ્રકાશમાં આવતા જનતા ચિંતિત બની છે. પોલીસ રાત્રી પેટ્રોલિંગ સઘન બનાવીને વાહનચોરોને ઝડપી લે તેવી માંગ ઉઠવા પામી છે.
ગુલામહુશેન ખત્રી રાજપારડી જિ.ભરૂચ
