રાજકોટ મનપા દ્વારા પ્રોપર્ટીનાં ટેકસની હાર્ડ રિકવરી શરૂ : ૫૪ મિલકતો પર નોટીસ ફટકારી

કોર્પોરેશનની વેરા વસૂલાત શાખા દ્વારા શહેરના અલગ-અલગ વિસ્તારોમાં ટેક્સ રિક્વરીની કામગીરી હાથ ધરવામાં આવી હતી. જે અંતર્ગત આજે રિઢા બાકીદારોની 54 મિલકતોને માંગણા નોટિસ આપવામાં આવી હતી. જ્યારે ચાર મિલકતો સીલ કરવામાં આવી હતી. બપોર સુધીમાં 31.80 લાખની વસૂલાત થવા પામી હતી. આજે હાથ ધરવામાં આવેલી ટેક્સ રિક્વરીની કામગીરી અંતર્ગત શહેરના સેન્ટ્રલ ઝોન વિસ્તારમાં 31 મિલકતોને નોટિસ આપવામાં આવતા રૂ.11.48 લાખની વસૂલાત થવા પામી હતી. જ્યારે વેસ્ટ ઝોનમાં બે મિલકતો સીલ કરવામાં આવી હતી અને 17 મિલકતોને માંગણા નોટિસ ફટકારવામાં આવતા રૂ.8.90 લાખની વસૂલાત થઇ છે. ઇસ્ટ ઝોનમાં બે મિલકતોને સીલ કરવામાં આવી છે જ્યારે 6 મિલકતોને માંગણા નોટિસ ફટકારવામાં આવતા બપોર સુધીમાં 11.42 લાખની વસૂલાત થવા પામી છે. રૂ.340 કરોડનો ટાર્ગેટ હાંસલ કરવા માટે ટેક્સ બ્રાન્ચ દ્વારા ગઇકાલથી હાર્ડ રિક્વરી શરૂ કરવામાં આવી છે. પ્રથમ દિવસે 45 મિલકતો સીલ કરવામાં આવી હતી. જ્યારે 80 લાખથી વધુની રિક્વરી થવા પામી હતી. આગામી દિવસોમાં બાકી વેરો વસૂલવા માટેની ઝુંબેશ વેગવાન બનાવવામાં આવશે.