ભરૂચ જિલ્લાના નેત્રંગથી મોવી જવાનાં માર્ગ પર મોવી બસ સ્ટેન્ડ નજીક એક હાઇવા ડમ્પરના ચાલકે પૂર પાટ હંકારી લાવી ખેતરેથી ઘરે જતા રસ્તો ક્રોસ કરી રહેલ 5 વર્ષીય બાળકને અડફેટે લેતા બાળકનું ઘટના સ્થળે જ મોત નીપજતા હાઇવા ડમ્પરનો ચાલક સ્થળ પરથી ગાડી લઈ ફરાર થઈ ગયો હતો.
પ્રાપ્ત માહિતી અનુસાર ભરૂચ જિલ્લાના નેત્રંગ મોવી રોડ પર રાકેશભાઈ બોખાભાઈ વસાવા નાઓ પોતાના બે બાળકો સાથે ખેતરેથી પોતાના ઘરે મોવી ટેકરા ફળિયા તરફ જઈ રહ્યા હતા દરમ્યાન તેઓનો પાંચ વર્ષીય દીકરો રોનક વસાવા પ્રથમ રસ્તો ક્રોસ કરી રહ્યો હતો, ત્યારે જ અચાનક પૂર ઝડપે મોવી ગામ તરફ આવી રહેલ હાઇવે ડમ્પર નંબર DD 02 G 9842 ના ચાલકે રોનકને અડફેટે લેતા તેને શરીરના ભાગે ગંભીર ઈજાઓ પહોંચતા તેનું ઘટનાઓ સ્થળે જ કમકમાટી ભર્યું મોત નીપજ્યું હતું, જે બાદ હાઇવા ટ્રકનો ચાલાક સ્થળ ઉપરથી વાહન લઈ રાજપીપલા તરફ નાસી ગયો હતો.
અચાનક સર્જાયેલ અકસ્માતની ઘટનાના પગલે સ્થળ ઉપર લોક ટોળા ભેગા થઈ ગયા હતા જે બાદ ઘટનાઓ અંગેની જાણ નેત્રંગ પોલીસને કરવામાં આવતા પોલીસે સ્થળ પર દોડી જઈ મૃતક બાળકની લાશનો કબ્જો લઈ તેને પોસ્ટમોર્ટમ અર્થે ખસેડી ફરાર ડમ્પરના ચાલક વિરુદ્ધ ગુનો દાખલ કરી તેને ઝડપી પાડવાના ચક્રોગતીમાન કર્યા હતા.
