નવાગામ-બારેજા રોડ પર માલ વાહક ટેમ્પીએ મોટરસાયકલને ટક્કર મારતા અકસ્માત સર્જાયો જેમાં એકનુ મોત નિપજ્યું આ બનાવ મામલે ખેડા ટાઉન પોલીસમાં ફરિયાદ નોંધાઈ છે.
ચલીન્દ્રા ગામે રહેતા નરેશભાઈ શીવાલાલ ડામોર ગઇ કાલે મિત્રનું બાઇક લઈને પાછળ નાના દિકરાને બેસાડી કોઈ કામથી નવાગામથી બારેજા ગયા હતા. સાંજે પરત આવતાં પેટ્રોલપંપ પાસે પુરપાટે આવતી માલ વાહક ટેમ્પી ના ચાલકે ઉપરોક્ત મોટરસાયકલને ટક્કર મારી હતી જેના કારણે મોટરસાયકલ ચાલક નરેશભાઈ અને તેમના દીકરા ગગન રોડ ઉપર પટકાતા શરીરે ગંભીર ઇજાઓ પહોંચી હતી. આ અકસ્માતમાં નરેશભાઈનું ઘટના સ્થળે કમ કમાટી ભર્યું મોત નિપજયું હતું અને તેમના દીકરા ગગનને સારવાર માટે ૧૦૮ એમ્બ્યુલન્સ દ્વારા અમદાવાદ સિવિલ હોસ્પિટલ ખાતે લઈ જવામાં આવ્યા હતા. આ બનાવ સંદર્ભે મરણજનારના નાનાભાઈ મોહનભાઈ ડામોરે ટેમ્પીના ચાલક સામે ખેડા ટાઉન પોલીસમાં ફરિયાદ નોંધાવી છે.
નરેશ ગનવાણી : નડિયાદ
