ભાઇ-બહેન બે દિવસ પહેલાં નદીમાં ન્હાવા ગયાં હતાં
ભરૂચ
અંકલેશ્વરના ગડખોલ પાટિયા વિસ્તારમાં જલારામ સોસાયટીમાં રહેતા 22 વર્ષીય મધુ દીપુ સિંહના બે વર્ષ પહેલાં લગ્ન થયાં હતાં. તેમને કમળો થતાં તેની સારવાર ચાલી રહી હતી. સારવાર પૂર્ણ થયાં બાદ ઘરે આવતાં તેઓ તેમના ભાઈ સાથે ગોલ્ડન બ્રિજના અંકલેશ્વર તરફ બે દિવસ પહેલાં નર્મદા નદીમાં નાહવા માટે ગયા હતા. ભાઈ બહેન નદીમાં નાહી રહ્યા હતા તે દરમિયાન બહેન અચાનક જ નદીના પાણીમાં તણાવવા લાગી હતી. જેના પગલે ભાઈએ બૂમાબૂમ કરી મૂકી હતી. બૂમ સાંભળી આસપાસના લોકો ભેગા થઈ ગયા હતા. આ અંગેની જાણ સામાજિક કાર્યકર ધર્મેશ સોલંકીને કરવામાં આવતા તેઓ અને તેમની ટીમ ઘટના સ્થળે દોડી આવી હતી. ફાયર ફાયટરો પણ નદી કિનારે પહોંચ્યા હતા. પાણીમાં ગુમ યુવતીની શોધખોળ શરૂ કરી હતી. બનાવની જાણ થતાં પોલીસ કાફલો પણ દોડી આવ્યો હતો. પાલિકાના લાશ્કરો દ્વારા સતત બે દિવસથી મહિલાનો મૃતદેહ શોધવાની કવાયતમાં હતાં. દરમિયાનમાં શનિવારે બપોરે તેની લાશ મળી આવી હતી. અંકલેશ્વર બી ડિવિઝન પોલીસે આ મામલામાં વધુ તપાસ હાથ ધરી હતી.
