રેલવે ગોદીમાંથી યુરિયા ભરીને ટ્રક ડભોઈ જઈ રહી હતી
ભરૂચ.
ભરૂચ શહેરમાં એક તરફ રોડ બને અને તુરંત કોઈને કોઈ કારણસર રોડ પુન: ખરાબ થઈ જાય તેમ છાસવારે બને છે. ત્યારે ભરૂચની કલેક્ટર કચેરી પરનો રોડ તાજેતરમાં જ બનાવવામાં આવ્યો હતો. જોકે, રોડની સાઈડમાંથી પસાર થતી ગટરના ચેમ્બર બેસાડવાની કામગીરી બાકી હતી. જોકે, હાલમાં જ પાલિકાએ ગટર લાઈન પરના ચેમ્બર બેસાડવા સાથે રોડપરનું કાર્પેટીંગ કરી દેવાયું હતુ.
દરમિયાનમાં સોમવારે સવારના સાડાદશ અગિયાર વાગ્યાના અરસામાં રેલવે ગોદીમાંથી યુરિયાની બેગો ભરીને ડભોઈ જવા માટે નિકળેલી એક ટૂક ત્યાંથી પસાર થઈ રહી હતી.તે વેળાં તે ગટર લાઈનના ચેમ્બર પાસે તાજેતરમાં જ કરાયેલાં પુરાણમાં ઘુસી ગઈ હતી. જેના કારણે વાહન વ્યવહારને અસર પડી હતી. પાલિકા તંત્રએ ઘટના બાદ સત્વરે મરામત કામ કરીને રોડ પુન: બનાવી દેવાશે તેવી બાંહેધરી આપી હતી.
નોંધનિય છે કે, ભરૂચ શહેરી વિસ્તારમાં ભારેવાહનોની અવર-જવર પર સવારના ૮થી રાત્રીના ૮ વાગ્યા સુધી પ્રતિબંધ છે. ત્યારે યુરિયાની ગુણો ભરીને જતી ટ્રક ચાલકે બપોરના સમયે માલસામાન વહન કરવા માટેની પરમિશન લીધી હતી કે નહીં તે દિશામાં તપાસ કરવામાં આવે તેવી માગ ઉઠી છે.
