ભરૂચ.
આમોદમાં આવેલાં બચ્ચો કા ઘર પાસે રહેતાં સૈયદ મોહમદ ઇરફાન મોહમદ ઇશાહક અને તેના પરિવારજનોનું ગામમાં દરબાર ગઢ બગીચાવાળું કંપાઉન આવેલું છે. જેમાં તેમની બહેનના મકાનમાં મુળ તમિલનાડુનો પરિવાર ભાડેથી રહેતો હતો. દરમિયાનમાં બપોરના સમયે તે ભાડૂઆતે સૈયદ મોહમદ ઇરફાનને ફોન કરી જણાવ્યું હતું કે ,તેમના ઘરનની પાછળ કોઇએ એક નવજાત તાજી જન્મેલી બાળકીને ત્યજી દીધી છે. જેના પગલે તેઓ તુરંત સ્થળ પર દોડી ગયાં હતાં. તેમણે જોતા તેમના બહેનના ઘરની પાછળ ગેલેરી પાસે એક નવજાત બાળકી ખુબજ રડતી હાલતમાં હોઇ તેનો કોઇ વાલીવારસ મળ્યાં ન હતાં.જેના પગલે તેમણે આમોદ પોલીસને જાણ કરતાં ટીમે સ્થળ પર દોડી આવી બાળકીનો કબજો મેળવી તેેન આમોદ સીએચસી ખાતે સારવાર માટે ખસેડી હતી. તેમજ બાળકીને ત્યાં ત્યજી દેનારાઓના સગડ મેળવવા માટેની કવાયત હાથ ધરી છે.
