રાત્રીના સમયે અચાનક ગાય રોડ પર આવી જતાં દુર્ઘટના સર્જાઇ
ભરૂચ.
વાગરાની સુવા ચોકડી પાસે આવેલી વિશાલ એન્જિનિયરિંગ કંપની સામે રહેતો કુમાર લોકબહાદુર થાપા મજુરી કામ કરે છે. તેનો મિત્ર ભોલારામ મેઘી ( હાલ રહે. જોલવા બીગબોસની સામે, મુળ રહે. મુંગેર, બિહાર) સાથે રાત્રીના નવેક વાગ્યે ગણપતિનો પ્રસાદ લેવા માટે જોલવા ગયાં હતાં. જે બાદ ભોલારામને ગલેન્ડા ગામ પાસે આવેલી રેપ્ટા કોર્સ કંપનીમાં ચ્હા આપવા જવાનું હોવાથી તેઓ બાઇક પર રાત્રીના અગિયાર વાગ્યાના અરસામાં સુવા ચોકડીથી ગલેન્ડા ગામ તરફ જવા નિકળ્યાં હતાં. દરમિયાનમાં સુવા ચોકડીથી થોડે દૂર જતાં એક ગાય અચાનક રોડ પર આવી જતાં અંધારાને કારણે તેમની બાઇક ગાય સાથે ધડાકાભેર ભટકાતાં બન્ને જમીન પર પટકાયતાં બન્નેને ગંભીર ઇજાઓ થઇ હતી. ઇજાગ્રસ્તોને સારવાર માાટે વાગરાની રેફરલ હોસ્પિટલ ખાતે ખસેડવામાં આવ્યાં હતાં.જ્યાં સારવાર દરમિયાન ભોલારામ મેઘીનં મોત થયું હોવાનું જાણવા મળ્યું હતું. બનાવને પગલે દહેજ પોલીસે ગુનો નોંધી આગળની કાર્યવાહી હાથ ધરી છે.
