પહેલાં બહેનના વિઝા થતાં યુકે જતાં ભાઈએ પણ ફાઈલ મુકી
। ભરૂચ !
ખરૂચ તાલુકાના ટંકારિયા ગામે રહેતાં મિન્હાજ ઝૂબેર ધોલીયા ( વોરા પટેલ) ખેતી કરી પરિવારનું ગુજરાન ચલાવે છે. તેમની સગી બહેન મુનિરાબાનુને વર્ષ ૨૦૨૩માં યુકે જવાનું હોય તેમણે પાલેજ ખાતે આવેલાં પટેલ ઓવરસીસ કન્સલ્ટન્ટ નામની ઓફિસનો સંપર્ક કર્યો હતો. જ્યાં વિઝા એજન્ટ તરીકે ઈરફાન ઈલ્યાસ પટેલ સાથે તેમની મુલાકાત થઈ હતી. ઈરફાને તેમની બહેનના વિઝા માટેની તમામ પ્રક્રિયા કરતાં તેમના વિઝા આવી ગયાં હતાં. જેથી તેમની બહેન યુકે જતી રહી હતી. દરમિયાનમાં મિન્હાજને પણ યુકે જવાનું હોઈ તેમણે પુનઃ ઈરફાન પટેલનો સંપર્ક કર્યો હતો. તેમની બહેનના વિઝા બની ગયાં હોવાથી તેને ઈરફાન પર વિશ્વાસ બેઠો હતો.
ઈરફાને તેમના યુકેના વિઝા કરી આપવાના બદલામાં ૯ લાખ રુપિયા થશે તેવી બાંહેધરી આપતાં તેમણે ઘરે જઈ માતાને વાત કરી હતી. તેમની માતાએ તેમના દાગીના તેમને આપતાં તે દાગીના તેમણે એસબીઆઈ બેકમાં જમા કરી તેના બદલામાં ૧૦ લાખની લોન લીધી હતી. જે બાદ તેમણે તે પૈકીના ૯ લાખ રૂપિયા ઈરફાનને આપ્યાં હતાં. જે બાદ મિન્હાજ ઈરફાનની ઓફિસે પહોંચી વિઝાની વાત કરતાં ઈરફાન ખોટા વાયદા કરતો હતો. દરમિયાનમાં ઈરફાને પાલેજની ઓફિસ બંધ કરી સુરત જતો રહ્યો હતો. જે બાદ ઓએ સુરત ખાતે સૈયદપુરા પારસી શેરી ખાતે ઈરફાનની ઓફિસ આવેલી હોવાની વિગતો મેળવી તેમણે ત્યાં પણ અનેક ધક્કા ખાધા હતાં. જોકે, તેણે રૂપિયા ચુકવ્યાં ન હતાં. જે બાદ ફોન પણ બંધ કરી દીધો હતો. તેનો બીજો નંબર શોધી તેના પર સંપર્ક કરતાં તેણે તે વિદેશ જતો રહ્યો હોવાનું જણાવી ઠગાઈ કરતાં આખરે તેમણે પાલેજ પોલીસ મથકે ફરિયાદ નોંધાવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.
