ભરૂચ :
ભરૂચ તાલુકાના બંબુસર ગામમાં વીજ ચોરીને રોકવા માટે વીજ કંપની દ્વારા વહેલી સવારે અચાનક ચેકિંગ અભિયાન હાથ ધરાયું હતું. ગ્રામ્ય વિસ્તારોમાં વધતી વીજ ચોરીને ધ્યાનમાં રાખી વીજ વિભાગ સતત ચેકિંગ કરી રહ્યો છે, જેના ભાગરૂપે બંબુસર ગામને નિશાન બનાવવામાં આવ્યું હતું.
આ દરમિયાન વીજ વિભાગની આશરે 10 જેટલી ગાડીઓ સાથેનો કાફલો ગામમાં પ્રવેશ્યો હતો. અધિકારીઓ અને કર્મચારીઓએ દરેક ઘરમાં જઈને વીજ મીટર, વાયરિંગ અને જોડાણોની વિગતવાર તપાસ કરી હતી, તેમજ સમગ્ર કાર્યવાહીનું વીડિયોગ્રાફી પણ કરવામાં આવી હતી.
તપાસ દરમિયાન ઘણા મકાનોમાં ગેરકાયદેસર વીજ જોડાણો અને ગેરરીતિઓ બહાર આવી હતી. આવા જોડાણોને તાત્કાલિક કાપી નાખવામાં આવ્યા હતા અને જવાબદાર લોકો સામે કાયદેસરની કાર્યવાહી હાથ ધરવામાં આવી છે. કાર્યવાહી દરમિયાન શાંતિ જળવાઈ રહે તે માટે પોલીસનો પણ પૂરતો બંદોબસ્ત ગોઠવવામાં આવ્યો હતો.
