વાંકલ :
સ્થાનિક સ્વરાજ્યની ચૂંટણીને લઈને રાજકીય ગરમાવો વધ્યો છે. ભારતીય જનતા પાર્ટી (ભાજપ) દ્વારા ઉમરપાડા તાલુકાની 16 બેઠકો અને માંગરોળ તાલુકાની 24 બેઠકો માટે ઉમેદવારી નોંધાવવામાં આવી છે.
ઉમેદવારી નોંધાવવા પહેલા ભાજપના ઉમેદવારો અને કાર્યકર્તાઓએ વાંકલ ખાતે હનુમાનજી મંદિર તેમજ સાંઈ મંદિર ખાતે દર્શન કરી આશીર્વાદ મેળવ્યા હતા. ત્યારબાદ મોટી સંખ્યામાં કાર્યકર્તાઓ અને સમર્થકો સાથે ભવ્ય રેલીનું આયોજન કરવામાં આવ્યું હતું.
આ રેલીમાં માંગરોળના ધારાસભ્ય ગણપતસિંહ વસાવા, દીપક વસાવા, દિનેશ સુરતી, અફઝલખાન પઠાણ સહિતના આગેવાનો જોડાયા હતા. ડીજેના તાલે વાજતે-ગાજતે અને ઉત્સાહભેર રેલી માંગરોળ તાલુકા મથક સુધી પહોંચી હતી.
અંતે મામલતદાર કચેરી ખાતે તમામ ઉમેદવારોએ સત્તાવાર રીતે પોતાની ઉમેદવારી નોંધાવી હતી. સમગ્ર કાર્યક્રમ દરમિયાન મોટી સંખ્યામાં કાર્યકર્તાઓ અને જનમેદની ઉપસ્થિત રહી હતી, જેનાથી ભાજપે પોતાની સંગઠન શક્તિનું પ્રદર્શન કર્યું હતું.
