વાંકલ ::
સુરત ગ્રામ્ય પોલીસ દ્વારા ગૌવંશ સંબંધિત ગુનાઓમાં સંડોવાયેલા નાસતા ફરતા આરોપીઓ સામે ચલાવવામાં આવી રહેલી ખાસ ઝુંબેશ હેઠળ માંગરોળ પોલીસે એક વર્ષથી ફરાર આરોપીને ઝડપી પાડી કાયદેસરની કાર્યવાહી હાથ ધરી છે.
પ્રાપ્ત માહિતી મુજબ, સુરત વિભાગના પોલીસ મહાનિરીક્ષક તથા સુરત ગ્રામ્ય પોલીસ અધિક્ષકના માર્ગદર્શન હેઠળ માંગરોળ વિભાગમાં ગૌવંશ સંબંધિત ગુનાઓમાં સંડોવાયેલા આરોપીઓને ઝડપી પાડવા માટે વિશેષ કામગીરી ચાલી રહી હતી.
તે અનુસંધાને માંગરોળ પોલીસ સ્ટેશનના પોલીસ ઇન્સ્પેક્ટર પી.એમ. દેસાઈના માર્ગદર્શન હેઠળ પોલીસ ટીમ પેટ્રોલિંગમાં હતી. દરમિયાન પોલીસ કોન્સ્ટેબલ વિપુલભાઈ વિકમભાઈને ચોક્કસ બાતમી મળી હતી કે ગૌવંશના ગુનામાં વોન્ટેડ આરોપી શાહરુખ ઉર્ફે બાબુ યુનુસ જીભાઈ (રહે. કોસાડી ગામ) પોતાના ગામે હાજર છે.
બાતમીના આધારે પોલીસે તાત્કાલિક કાર્યવાહી કરી આરોપીના રહેઠાણે રેડ પાડી હતી અને લાંબા સમયથી નાસતા ફરતા આરોપીને ઝડપી પાડવામાં સફળતા મેળવી હતી.
પોલીસ તપાસમાં આરોપી વિરુદ્ધ પ્રાણી સંરક્ષણ અધિનિયમ હેઠળ ગુનો નોંધાયેલ હોવાનું સામે આવ્યું છે. હાલ માંગરોળ પોલીસે આરોપી સામે આગળની કાયદેસરની કાર્યવાહી હાથ ધરી છે.
