ભરૂચ :
માં જગદંબાની આરાધનાના પર્વ નવરાત્રીના પ્રારંભ સાથે જ ભક્તિ અને આધ્યાત્મિકતાનો માહોલ જોવા મળી રહ્યો છે. ભરૂચના ઝાડેશ્વર સ્થિત પ્રજાપિતા બ્રહ્માકુમારી ઈશ્વરીય વિશ્વવિદ્યાલયના અનુભૂતિ ધામ ખાતે આસો નવરાત્રીના પ્રથમ નોરતે ભક્તિભાવપૂર્વક રાસ-ગરબાનું આયોજન કરવામાં આવ્યું હતું.
આ કાર્યક્રમમાં બ્રહ્માકુમારી સંસ્થાના મુખ્ય મથક રાજસ્થાનના માઉન્ટ આબુ સ્થિત જ્ઞાન સરોવરના ડાયરેક્ટર પ્રભાદિદીની વિશેષ ઉપસ્થિતિ રહી હતી. તેમની ઉપસ્થિતિમાં યોજાયેલા આ કાર્યક્રમમાં બ્રહ્માકુમારી સંસ્થાના મોટી સંખ્યામાં ભાઈ-બહેનો તેમજ અનુયાયીઓ ઉત્સાહભેર જોડાયા હતા.
નવરાત્રીના પ્રથમ નોરતે યોજાયેલા રાસ-ગરબામાં ભક્તિ, આધ્યાત્મિકતા અને આનંદનો અનોખો સંગમ જોવા મળ્યો હતો. માતાજીની આરાધનાના આ પર્વે ઉપસ્થિત ભાઈ-બહેનોએ રાસ-ગરબામાં સહભાગી બની ઉત્સવની ઉજવણી કરી હતી.
ઝાડેશ્વરના અનુભૂતિ ધામ ખાતે યોજાયેલા આ કાર્યક્રમથી સમગ્ર પરિસરમાં ધાર્મિક અને આધ્યાત્મિક વાતાવરણ સર્જાયું હતું. નવરાત્રીના પ્રારંભે યોજાયેલા આ આયોજનમાં મોટી સંખ્યામાં સંસ્થાના અનુયાયીઓની ઉપસ્થિતિએ ઉત્સવના માહોલને વધુ ઉત્સાહપૂર્ણ બનાવ્યો હતો.
