વાગરા: ભરૂચ જિલ્લાના વાગરા તાલુકાના સારણ ગામે દક્ષિણ ગુજરાત વીજ કંપની લિમિટેડ (DGVCL) દ્વારા વહેલી પરોઢે સરપ્રાઈઝ ચેકિંગ હાથ ધરવામાં આવતાં વીજળીની ચોરી અને ગેરકાયદે વીજ વપરાશ કરતા તત્ત્વોમાં ફફડાટ ફેલાયો હતો. વિજિલન્સ ટીમ અને સ્થાનિક તંત્ર દ્વારા વીજચોરી અટકાવવા સઘન તપાસ હાથ ધરવામાં આવી હતી.
મળતી માહિતી અનુસાર, DGVCLની ટીમ વહેલી સવારે સારણ ગામે પહોંચી હતી. લોકો ઊંઘમાં હતા તે દરમિયાન અધિકારીઓ, ટેકનિકલ સ્ટાફ અને સુરક્ષા કર્મચારીઓએ ગામના અલગ-અલગ વિસ્તારોમાં વીજ જોડાણોની તપાસ કરી હતી. અચાનક હાથ ધરાયેલી આ કાર્યવાહીને પગલે વીજ વપરાશમાં ગેરરીતિ આચરતા લોકોમાં દોડધામ મચી હતી.
તપાસ દરમિયાન ઘરવપરાશ અને વાણિજ્યિક વીજ જોડાણોમાં ગેરકાયદે કનેક્શન, મીટર સાથે છેડછાડ તેમજ મંજૂરી વિના વીજળીનો ઉપયોગ કરવા જેવી ગેરરીતિઓ સામે આવી હોવાની વિગતો જાણવા મળી છે. ટીમે ગેરરીતિમાં ઉપયોગમાં લેવાયેલા વાયરો જપ્ત કરી નિયમ મુજબ વીજ વપરાશની આકારણી અને દંડાત્મક કાર્યવાહી હાથ ધરી છે.
વીજચોરીના કારણે વીજ કંપનીને આર્થિક નુકસાન થવાની સાથે નિયમિત બિલ ભરતા પ્રામાણિક ગ્રાહકો પર પણ તેની આડઅસર પડે છે. ત્યારે વીજચોરી અટકાવવા માટે અન્ય ગામોમાં પણ આવી સરપ્રાઈઝ ચેકિંગ ઝુંબેશ હાથ ધરવામાં આવે તેવી માગ ઊઠી છે.
જોકે, આ કાર્યવાહીમાં કેટલાં વીજ જોડાણોમાં ગેરરીતિ મળી, કેટલા વાયરો જપ્ત કરાયા અને કુલ કેટલો દંડ ફટકારાયો તે અંગેની સત્તાવાર વિગતો હજુ સુધી જાહેર થઈ નથી.
