અંકલેશ્વર તાલુકાના સારંગપુર ગામે આવેલી શાળાના વિદ્યાર્થીઓને એક ટેમ્પોમાં ક્ષમતા કરતાં વધુ સંખ્યામાં બેસાડીને લઈ જવામાં આવતા હોવાનો વીડિયો સોશિયલ મીડિયામાં વાયરલ થયો છે. વીડિયોમાં શાળાનાં બાળકોને ટેમ્પોની પાછળની ખુલ્લી ટ્રોલીમાં ઠસોઠસ ભરેલાં જોઈ શકાય છે. આ દૃશ્યને પગલે બાળકોની સુરક્ષા અને તેમને શાળાએ લઈ જવા માટે ઉપયોગમાં લેવાતા વાહન અંગે સવાલો ઊઠ્યા છે.
વાયરલ વીડિયોમાં શાળાના ગણવેશમાં અનેક વિદ્યાર્થીઓ ટેમ્પોની પાછળની ટ્રોલીમાં ઊભેલા અને બેઠેલા જોવા મળે છે. કેટલાક બાળકો ટ્રોલીની લોખંડની કિનારી પકડીને ઊભા છે, જ્યારે નાનાં બાળકો પાછળની બાજુએ બેસેલાં નજરે પડે છે. આવી સ્થિતિમાં વાહન અચાનક બ્રેક મારે અથવા રસ્તા પર અકસ્માત સર્જાય તો બાળકોને ગંભીર ઈજા થવાની આશંકા છે.
શાળાએ જતાં બાળકોની સલામતીની જવાબદારી અત્યંત મહત્ત્વની છે. ત્યારે સારંગપુર ગામની આ ઘટનામાં સંબંધિત શિક્ષણ વિભાગ અને સ્થાનિક તંત્ર દ્વારા તપાસ કરવામાં આવે, બાળકોને લઈ જવા માટે વપરાતા વાહનની યોગ્યતા ચકાસવામાં આવે અને નિયમોનું ઉલ્લંઘન થયું હોય તો જવાબદારો સામે કાર્યવાહી કરવામાં આવે તેવી માંગ ઊઠી છે.
