ભરૂચ શહેરનો શક્તિનાથ વિસ્તાર એટલે લોકોથી ધમધમતો વિસ્તાર માનવામાં આવે છે. હાલ દિવાળી તહેવાર નિમિતે બજારમાં ભારે ભીડ હોવાથી આ વિસ્તારમાં લોકોની ખૂબ જ અવર-જવર રહે છે. તેમ છતાં પણ ગત રોજ સાંજના સમયે શક્તિનાથ વિસ્તારની એસ.બી.આઈ. બેન્કની નજીકથી એક ઈસમ સાયકલ ચોરી કરી ફરાર થઇ ગયો હતો. એસ.બી.આઈ. બેંકની સામે આવેલ સરદાર શોપિંગ સેન્ટરના કોઈ ટ્યુશન ક્લાસમાં આવેલ એક વિદ્યાર્થીએ પોતાની સાયકલ પાર્ક કરી હતી. ત્યાં જ થોડા સમય પછી એક અજાણ્યો ઈસમ સાયકલની ઉઠાંતરી કરી ફરાર થઈ જાય છે. જ્યારે વિદ્યાર્થી બાળક ટ્યુશન બાદ પોતાની સાયકલ લેવા પાર્કિંગ પાસે આવે છે ત્યારે તેને ત્યાં સાયકલ નહીં જણાતા તેને ચોરી થઈ ગઈ હોવાનું અનુમાન લગાવ્યું હતું.
આ સમગ્ર ઘટનાનો સી.સી.ટી.વી. વિડીયો એસ.બી.આઈ. બેન્કના એ.ટી.એમ. સેન્ટર નજીક રાખવામાં આવેલ સી.સી.ટી.વી. કેમેરામાં કેદ થઈ જવા પામ્યો હતો. ભરૂચ પોલીસ આવા ઇસમોને ઝડપી પાડી તેમના વિરુદ્ધ કાયદેસરની કાનૂની કાર્યવાહી કરે તેવી લોકમાંગ પણ ઉઠી છે.
