સ્ટેચ્યુ ઓફ યુનિટીને જોડતા અંકલેશ્વરથી રાજપીપલાના ધોરીમાર્ગ પર દોડતા વાહનોની સંખ્યામાં દિવસે દિવસે નોંધપાત્ર વધારો થઇ રહ્યો છે.અસંખ્ય વાહનોની અવરજવરથી ચોવીસ કલાક જીવંત રહેતા આ માર્ગ પર અવારનવાર નાનામોટા અકસ્માતો સર્જાય છે.ઘણીવાર આ અકસ્માતો જીવલેણ પણ બન્યા છે. ઝઘડીયા તાલુકો ભૌગોલિક દ્રષ્ટિએ ભરૂચ જિલ્લામાં આગળ પડતા સ્થાને ગણાય છે.ત્યારે તાલુકામાંથી પસાર થતાં આ મહત્વના ધોરીમાર્ગ પર દિવસે દિવસે વધી રહેલા અકસ્માતોથી ચિંતાની લાગણી ફેલાવા પામી છે.ઉમલ્લાથી ઝઘડીયા વચ્ચે ઘણા વાહનો રોંગસાઇડનો ઉપયોગ કરીને દોડતા હોવાની વ્યાપક ચર્ચાઓ ઉઠવા છતાં આવા વાહનોને જાણે રોંગસાઇડે જવાનો પરવાનો મળી ગયો હોય એમ છુટથી નિયમોનો ભંગ થતો દેખાય છે.ઉમલ્લા રાજપારડી અને ઝઘડીયાના ચાર રસ્તાઓ પર ટ્રાફિક પોલીસના જવાનો ફરજ બજાવે છે.છતાં કેમ વાહનો નિયમોનો ભંગ કરીને દોડે છે ?એ બાબત જનતામાં પ્રશ્નાર્થ સર્જે છે.ઘણીવાર ટ્રાફિક પોલીસના કેટલાક જવાનો તેમને જે જગ્યાએ ફરજ બજાવવાની કામગીરી સોંપાઇ છે તેનાથી દુર બે ત્રણ કીલોમીટર દુર ઉભેલા દેખાતા હોવાની પણ લોકચર્ચાઓ જાણવા મળી છે.રાજ્ય સરકારે ઘણા બધા ચેકપોસ્ટ રદ કર્યા હોવાનું જાણવા મળ્યુ છે.ત્યારે પોતાની ફરજના સ્થળથી અલગ જગ્યાએ જઇને ઉભા રહેવાની તેમને કાયદેસરની મંજુરી મળેલી છેકે કેમ તે પણ તપાસનો વિષય છે.ત્યારે આ ધોરીમાર્ગ પર અવારનવાર અકસ્માત સર્જતા રોંગ સાઇડે દોડતા વાહનો પર અંકુશ લાવવા તંત્ર કવાયત હાથ ધરે તેવી લોકમાંગ ઉઠવા પામી છે.સ્ટેચ્યુ ઓફ યુનિટી ને ખુલ્લુ મુકાયે લાંબો સમય વિતવા છતાં તેને જોડતા આ મહત્વના ધોરીમાર્ગ પર નિયમો નો ભંગ કરી દોડતા વાહનો પ્રત્યે તંત્ર લાલ આંખ કરીને તેમને નિયમોનું ભાન કરાવે તોજ તે વાત સ્ટેચ્યુ ઓફ યુનિટી ની શોભા અને મોભાને અનુરૂપ ગણાશે.
ગુલામહુશેન ખત્રી રાજપારડી જિ.ભરૂચ
