ઝઘડીયા તાલુકાના વંઠેવાડ ગામ નજીક એક એકટીવા ગાડી પર લઇ જવાતો વિદેશી દારૂ પકડાયો હતો.મળતી વિગતો મુજબ ગઇકાલે ઝઘડિયા પોલીસ પેટ્રોલિંગમાં હતી ત્યારે તે દરમિયાન બાતમી મળી હતી કે વાસણા ગામથી ઝઘડિયા ગામ તરફ આવવાના રસ્તા પર એક એકટીવા ગાડીમાં કોઇ ઇસમ ભારતીય બનાવટનો ઇંગ્લિશ દારૂ લઈ આવી રહ્યો છે. બાદમાં ઝઘડિયા પોલીસને બાતમી મળ્યા મુજબ વંઠેવાડ ગામ પાસે વોચ ગોઠવી હતી. આ દરમિયાન એક એકટીવા ગાડી વાસણા ગામ તરફથી આવતા જણાતા તેને રોકવાનો પ્રયાસ કર્યો હતો પરંતુ એક્ટીવા ચાલકે પુર ઝડપે વાહન ચલાવી ભાગી જવાની કોશિશ કરી હતી. પોલીસે પીછો કરતા એક્ટીવા સવાર ઇસમો ગાડી મુકીને અંધારાનો લાભ લઇ ભાગી છુટ્યા હતા.બાદમાં પોલીસે એકટીવા તપાસતા તેમાંથી અલગ અલગ બ્રાન્ડની નાની-મોટી કુલ ૯૫ બોટલો વિદેશી દારૂની મળી આવી હતી. ઝઘડિયા પોલીસે મુદ્દામાલ સહિત એકટીવા ગાડીનો કબ્જો લીધો હતો.પોલીસે કુલ રૂ.૪૪૦૦૦ જેટલી રકમનો મુદ્દામાલ જપ્ત કરીને ભાગી છુટેલ ઇસમોની ધરપકડ કરવા કવાયત હાથ ધરી હતી.
ગુલામહુશેન ખત્રી રાજપારડી જિ.ભરૂચ.
