ભરૂચ જિલ્લાનાં ગ્રામ્ય વિસ્તારોમાં આજકાલ વીજ કંપનીએ તવાઇ બોલાવતા વીજ ચોરોમા ફફડાટ ફેલાઈ જવા પામ્યો છે. જિલ્લાનાં કેટલાય ગ્રામ્ય વિસ્તારોમાં વીજ વિજિલન્સનાં વહેલી સવારે દરોડાઓ વીજ ચોરી કરતા તત્વોની ઉંધ હરામ કરી છે.
હાંસોટ તાલુકામાં ડી.જી.વી.સી.એલ. કંપનીની વિજિલન્સ કોર્પોરેટની 20 ટીમોએ પોલીસ બંદોબસ્ત સાથે વીજ ચેકીંગ હાથ ધરતાં તાલુકાના છ ગામોમાંથી 41 જોડાણોમાંથી અંદાજે 16 લાખ રૂપિયાની વીજચોરી ઝડપી પાડી છે.
પોલીસ બંદોબસ્ત વચ્ચે વીજ વિજિલન્સની ટીમો અચાનક ગ્રામ્ય વિસ્તારોમાં ચેકીંગમાં ઘુસી જતા હોવાની બાબતો સામે આવી છે જેમાં લાખ્ખો રૂપિયાનો દંડ પણ વસુલ કરવામાં આવ્યું છે.
શિયાળાની ગુલાબી ઠંડીના ઠંડક ભર્યા વાતાવરણમાં હાંસોટ તાલુકાના નગરજનો મીઠી નિંદર માણી રહ્યા હતા ત્યારે આજે અચાનક વહેલી સવારે ડી.જી.વી.સી.એલ. કંપનીની વિજિલન્સ કોર્પોરેટની 20 ટીમો પોલીસ બંદોબસ્ત સાથે ત્રાટકી હતી. હાંસોટ તાલુકામાં આવેલાં કાંટાસાયણ, અલવા, સુણેવકલ્લા, આમોદ અને ખરચ ગામોમાં વીજ જોડાણોમાં તપાસ હાથ ધરવામાં આવી હતી. 250 જેટલા ઘરોની તપાસ કરતાં 20 મીટર તથા 21 એન સી (ડાયરેક્ટ) વાયર આમ કુલ 41 કેસ મળી અંદાજીત 16 લાખ રૂપિયાની વીજ ચોરી ઝડપી પાડવામાં આવી છે. વીજકંપનીના ચેકિંગના પગલે વીજચોરી કરતાં લોકોમાં દોડધામ મચી ગઇ છે.
