ભરૂચ જિલ્લાના ઝઘડીયા તાલુકાના ખરચી નજીક મેઇન રોડ પાસે આવેલ એક બંધ ફાર્મ હાઉસનો દરવાજો તોડીને કોઇ અજાણ્યા ચોર રૂ.૧૪૦૦૦ ની કિંમતના ઇન્વેટર અને બેટરીની ચોરી કરી ગયા હતા.
ઝઘડીયા પોલીસમાંથી મળતી વિગતો મુજબ અંકલેશ્વર ખાતે રહેતા અનિતભાઇ રતિલાલ શાહની માલિકીનું સુર્યોદય સાગર વિહારધા નામનુ ફાર્મ હાઉસ ઝઘડીયા તાલુકાના ખરચીથી અંકલેશ્વર જતા રોડ નજીક આવેલુ છે. આ ફાર્મ હાઉસ મોટાભાગે બંધ રહે છે અને એક બે મહિનામાં એકાદવાર જૈન સાધુઓ રોકાય ત્યારે ખોલવામાં આવે છે. ફાર્મ હાઉસની દેખરેખનુ કામ ખરચીના મોહનભાઇ નાનજીભાઇ મકવાણાને સોંપેલુ છે. ગતરોજ મોહનભાઇ સાંજના સમયે ફાર્મ હાઉસ પર ગયા ત્યારે કમ્પાઉન્ડની ઇંટો કાઢી નાંખેલ જણાતા તેમણે તપાસ કરીતો ફાર્મ હાઉસના લોખંડની ગ્રીલવાળા દરવાજાનુ લોક તુટેલુ જણાયુ હતુ. મકાનમાં જોતા લાઇટની વ્યવસ્થા માટે રાખેલ રૂ.૧૪૦૦૦ ની કિંમતના ઇન્વેટર અને બેટરી ચોરાયા હોવાની જાણ થઇ હતી. તેમણે ફાર્મ હાઉસના માલિકને આ બાબતે જાણ કરી હતી. ચોરીની આ ઘટના અંગે મોહનભાઇએ ઝઘડીયા પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
