અંકલેશ્વરના નેશનલ હાઈવે પર નવજીવન હોટલ પાસે રેડીમેડ કપડા ભરેલા ચાલુ ટેમ્પોમાં આગ લાગતા ટ્રક ચાલક તેમજ રાહદારીઓમાં દોડધામ મચી ગઇ હતી.
અંકલેશ્વર નજીક નવજીવન હોટલ પાસે લક્ષ્મી કાંટા નજીક કપડાં ભરેલી એક માલવાહક ટેમ્પો જઈ રહ્યો હતો, આ ટેમ્પોમાં અચાનક જ આગ લાગી જતા દોડધામના દ્રશ્યો સર્જાયા હતા. મળતી માહિતી મુજબ વાપીથી ટેમ્પો નંબર-જી.જે.15.એ.ટી.9174 નો ચાલક આપદાબ અઝર મેઝર રેડિમેડ કપડાં ભરી વડોદરા ખાતે ડિલિવરી કરવા જતો હતો તે દરમિયાન અંકલેશ્વર નેશનલ હાઇવે ઉપર નવજીવન હોટલ પાસેના લક્ષ્મી કાંટા નજીક અચાનક ટેમ્પોમાં આગ ભભૂકી ઉઠી હતી. આ આગના પગલે અહીંના વિસ્તારમાં વાહન ચાલકોમાં ભારે દોડધામ મચી ગઇ હતી. જોતજોતામાં આગે વિકરાળ સ્વરૂપ પણ ધારણ કર્યું હતું પરંતુ સમય સુચકતા વાપરી આગના બનાવના પગલે ટ્રક ચાલક ટેમ્પોમાંથી બહાર નીકળી ગયો હતો અને તાત્કાલિક ધોરણે ફાયર વિભાગને જાણ કરવામાં આવી હતી. ફાયર ફાયટરો તાત્કાલિક સ્થળ પર દોડી આવ્યા હતા અને પાણીનો મારો ચલાવી આગ ઉપર કાબૂ મેળવ્યો હતો. આગની ઘટનામાં કોઈને પણ જાનહાનિ નહીં થતાં સૌ કોઈએ રાહતનો શ્વાસ લીધો હતો. જોકે ટેમ્પોમાં રહેલ રેડિમેડ કપડાં સહિત ટેમ્પો બળીને ખાખ થઈ ગયો હતો.
મુકેશ વસાવા : અંકલેશ્વર
