ભરૂચનાં પ્રિતમ નગર પાસે આવેલ રચના પાર્ક સોસાયટીના એક મકાનમાં આગથી દોડધામ, ત્રણ વ્યક્તિઓનો આબાદ બચાવ.

ભરૂચ જીલ્લામાં આવેલ પ્રિતમ નગર પાસે આવેલ રચના પાર્ક સોસાયટીમાં નજીવી આગને કારણે મકાનમાં આગ લાગી ગઈ હતી. જેની જાણ રહેણાક લોકોને થતાં વિસ્તારમાં દોડધામ મચી જવા પામી હતી. જોકે ઘરની અંદર રહેલા ત્રણ જેટલા સભ્યોનો બચાવ કરી લેવામાં આવ્યો હતો. ફાયરબ્રિગેડને ઘટનાની જાણ થતાં તેઓ ઘટના સ્થળે પહોંચી આગ પર કાબૂ મેળવી લીધો હતો.

બનાવ અંગે મળતી માહિતી અનુસાર, ભરૂચ પંથકમાં આવેલ રચના પાર્ક સોસયાટીમાં આજરોજ સવારના સમયે રહેણાક મકાનમાં રોજની જેમ પરિવારનાં સદસ્યએ ઘરે દીવો સળગાવ્યા બાદ પોતાના કામે લાગ્યા હતા જે બાદ દિવાની આગ એકાએક વિકરાળ સ્વરૂપ ધરાણ કરી લેતા ઘરની અંદર અચાનક આગ ફાટી નીકળતા દોડધામ મચી જવા પામી હતી જેને લઈને આસપાસના વિસ્તારના લોકો ઘટના સ્થળ પર આવી પહોચ્યા હતા અને આગ પર કાબૂ મેળવવાનો પ્રયત્ન કર્યો હતો અને વિસ્તારમાં ભારે અફરાતફરી મચી જવા પામી હતી. જે બાદ જેમ તેમ કરીને ઘરના ત્રણ જેટલા સદસ્યોને ભારે જહેમત બાદ બહાર કાઢવામાં આવ્યા હતા જે બાદ ફાયરબ્રિગેડ દ્વારા આગ પર કાબૂ મેળવી લેવામાં આવ્યો હતો પરંતુ ઘરવખરી બળીને ખાખ થઈ જવા પામી હતી પણ કોઈને જાનહાનિ ન પહોચતા વિસ્તારના લોકોએ હાશકારો અનુભવ્યો હતો.

રિધ્ધી પંચાલ : ભરુચ