બનાવ અંગેની પ્રાપ્ત માહિતી અનુસાર ભરૂચ તાલુકાના મહેગામથી મનાડ જતા માર્ગ પર આજે સવારના સમયે ઝાયલો કાર અને બાઇક વચ્ચે સર્જાયેલ ગમખ્વાર અકસ્માતમાં બે વ્યક્તિઓના ઘટના સ્થળે જ કમકમાટીભર્યા મોત નિપજતા આસપાસના વિસ્તારમાં ભારે ગમગીની ભર્યો માહોલ છવાયો હતો.
મહેગામ ગામ ખાતે રહેતા પ્રદીપ જયંતિ ગોહીલ અને પ્રશાંત છત્રસિંહ ગોહિલ નાઓ કોઈ કામ અર્થે મહેગામથી મનાડ ગામ વચ્ચે મોટરસાયકલ લઇ નીકળ્યા હતા દરમિયાન અચાનક ઝાયલો કારના ચાલકે સ્ટેરિંગ પરનો કાબૂ ગુમાવતા મોટરસાયકલ સાથે અકસ્માત સર્જાયો હતો, અકસ્માતની સમગ્ર ઘટનામાં બાઇક પર સવાર બંને યુવકોના ઘટના સ્થળે જ કમકમાટીભર્યા મોત નિપજ્યા હતા.
અકસ્માતની ઘટના બાદ મામલે ભરૂચ રૂરલ પોલીસને જાણ કરતા પોલીસે સ્થળ પર પહોંચી મૃતકોની લાશને પોસ્ટમોર્ટમ અર્થે ખસેડી મામલે અકસ્માત મોત અંગેનો ગુનો દાખલ કરી કાયદેસરની કાર્યવાહી હાથધરી છે.
