ભરૂચ જિલ્લાના ઝઘડીયા તાલુકાની ૬૭ ગ્રામ પંચાયતોની ચુંટણીની મતગણતરી ગત તા.૨૧ મીના રોજ યોજાઇ હતી. સામાન્યરીતે મતગણતરી બાદ વિજેતા ઉમેદવારો દ્વારા વિજય સરઘસ નીકળતા હોય છે. આ માટે મામલતદારની પરવાનગી લેવાની હોય છે. ઝઘડીયા તાલુકાના તલોદરા ગ્રામ પંચાયતમાં સરપંચ તરીકે વિજેતા થયેલ ઉમેદવારના પતિ વિઠ્ઠલભાઇ છગનભાઈ વસાવાએ વિજયની ખુશી મનાવવા માટે બેન્ડ સાઉન્ડ વગાડવા માટે ઝઘડીયા મામલતદારની પરવાનગી લીધી હતી. જેમાં તા.૨૩ ૨૪ ના રોજ બપોરના ૩ થી રાતના ૧૦ સુધીની પરવાનગી મળેલ. ત્યારબાદ પરવાનગી મુજબનો સમય વિતવા બાદ તા.૨૫ મીએ પણ વધારાના સમય સુધી રંદેરી ગામે બેન્ડ ચાલુ રખાયુ હતુ. ઝઘડીયા પોલીસને આની જાણ થતા સ્થળ પર જઇને તપાસ કરતા પરવાનગી ઉપરાંતના સમયે પણ બેન્ડ વગાડવાનુ ચાલુ જણાતા ઝઘડીયા પીઆઇ પી.એચ.વસાવાએ વિઠ્ઠલભાઇ છગનભાઈ વસાવા રહે.તલોદરા, પરવાનગી મેળવતી વખતે બાહેંધરી આપનાર ભાવેશભાઇ અમરસંગ વસાવા રમેશભાઈ ઇશ્વરભાઇ પટેલ તેમજ સંતોષભાઇ ભોલાપ્રસાદ યાદવ ત્રણેય રહે.તલોદરા, કલ્પેશભાઇ પટેલ રહે.તલોદરા, પરેશભાઇ બાલુભાઇ વસાવા રહે.ઝરણા તા.નેત્રંગ અને વિક્રમભાઇ કરશનભાઇ વસાવા રહે.નેત્રંગના વિરુધ્ધ હાલના કોરોના મહામારી વચ્ચે કોરોના સંક્રમણ ફેલાય એ રીતે વધુ માણસો ભેગા કરીને જાહેરનામાનો ભંગ કરવા બદલ ગુનો નોંધી કાયદેસર કાર્યવાહી હાથ ધરી હતી. ઝઘડીયા તાલુકામાં ચુંટણી પરિણામ બાદ વિજેતા ઉમેદવાર દ્વારા જાહેરનામા ભંગનો આ બીજો ગુનો નોંધાતા ચકચાર મચી જવા પામી છે.
ગુલામહુશેન ખત્રી રાજપારડી જિ.ભરૂચ
