અમદાવાદ : બજરંગ દળ દ્વારા એક મોલમાં પઠાણ ફિલ્મના લાગેલ પોસ્ટરોની તોડફોડ કરી વિરોધ કર્યો.

અમદાવાદના વસ્ત્રાપુર લેક પાસે આવેલા આલ્ફા વન મોલમાં વિશ્વ હિન્દુ પરિષદ અને બજરંગ દળના કાર્યકરોએ પઠાણ મૂવીનો વિરોધ કર્યો હતો. VHP ના ગુજરાત યુનિટે અગાઉ કહ્યું હતું કે તેઓ ફિલ્મ ‘પઠાણ’ને રાજ્યમાં રિલીઝ કરવા દેશે નહીં. ફિલ્મ પઠાણના ગીત ‘બેશરમ રંગ’નો વિરોધ થઈ રહ્યો છે જેમાં દીપિકા પાદુકોણ શાહરૂખ ખાન સાથે ઓરેન્જ બિકીનીમાં ડાન્સ કરતી જોવા મળી રહી છે. ગુજરાત VHP પ્રવક્તા હિતેન્દ્ર સિંહ રાજપૂતે કહ્યું કે અમે ગુજરાતમાં પઠાણનું સ્ક્રીનિંગ થવા દઈશું નહીં. અમદાવાદમાં ફિલ્મની રિલીઝ સામેના આજના વિરોધને રાજ્યભરના તમામ થિયેટર માલિકોને ચેતવણી તરીકે લેવો જોઈએ. તેઓએ તેમના થિયેટરો અથવા મલ્ટિપ્લેક્સમાં ફિલ્મ રિલીઝ કરવાનું ટાળવું જોઈએ. વિશ્વ હિન્દુ પરિષદ અને બજરંગ દળના કાર્યકરોએ બુધવારે અમદાવાદના વસ્ત્રાપુર વિસ્તારમાં એક મોલમાં હંગામો મચાવ્યો હતો અને આગામી શાહરૂખ ખાન-દીપિકા પાદુકોણ અભિનીત ફિલ્મના પોસ્ટરો અને અન્ય પ્રમોશનલ સામગ્રીનો નાશ કર્યો હતો, વસ્ત્રાપુર પોલીસ તાત્કાલિક ઘટનાસ્થળે પહોંચી હતી અને 5 કાર્યકરોની અટકાયત કરી હતી. VHP દ્વારા શેર કરવામાં આવેલ વિડિયોમાં, કાર્યકરો સૂત્રોચ્ચાર કરતા અને ‘પઠાણ’ના પોસ્ટરો અને તેના કલાકારોના મોટા કટઆઉટને ફાડી નાખતા જોઈ શકાય છે. શાહરૂખ ખાન અને દીપિકા પાદુકોણની ફિલ્મ ‘પઠાણ’ 25 જાન્યુઆરીએ સિનેમાઘરોમાં રિલીઝ થઈ રહી છે. ફિલ્મનું પહેલું ગીત ‘બેશરમ રંગ’ 12 ડિસેમ્બરે રિલીઝ થયું હતું. આ ફિલ્મ દ્વારા શાહરૂખ ખાન 4 વર્ષ બાદ સિલ્વર સ્ક્રીન પર વાપસી કરશે. તે છેલ્લે 2018 માં આવેલી ફિલ્મ ઝીરોમાં મોટા પડદા પર જોવા મળ્યો હતો. આ ફિલ્મ બોક્સ ઓફિસ પર એટલી સફળ રહી ન હતી. થોડા દિવસો પહેલા આ ફિલ્મને સેન્સર બોર્ડ સમક્ષ પ્રમાણપત્ર માટે રજૂ કરવામાં આવી હતી. સીબીએફસીના અધ્યક્ષ પ્રસૂન જોશીએ એક નિવેદન જારી કરીને કહ્યું કે પઠાણના નિર્માતાઓને ફિલ્મમાં કેટલાક ફેરફારો કરવા માટે સૂચના આપવામાં આવી છે.