સુરતથી અંબાજી સુધી 480 કિમીની સ્કેટિંગ યાત્રા પર વરાછાના બે બાળકોએ મૂક્યા દ્રઢ પગલા

પ્રથમ જ દિવસે 75 કિમીનું અંતર કાપી ભરૂચ પહોંચ્યા
ભરૂચ.
વરાછા વિસ્તારના બે નાનકડા બાળકોએ અદમ્ય સાહસ અને દ્રઢ સંકલ્પ સાથે સુરતથી અંબાજી સુધી લગભગ 480 કિલોમીટર લાંબી સ્કેટિંગ યાત્રા શરૂ કરી છે. ધાર્મિક ભાવના અને રમતગમત પ્રત્યેની લગનનું અનોખું સંગમ દર્શાવતી આ યાત્રામાં બંને બાળકોએ પ્રથમ જ દિવસે 75 કિલોમીટરનું અંતર પાર કરી ભરૂચ પહોંચીને સૌનું ધ્યાન ખેંચ્યું છે.
સુરતના પટેલ પરિવારના પાશ્વ પટેલ (ઉંમર 10 વર્ષ) અને પંથ પટેલ (ઉંમર 9 વર્ષ) છેલ્લા બે વર્ષથી નિયમિત રીતે સ્કેટિંગની તાલીમ લઈ રહ્યા છે. પરિવારના દાદા હિતેશ હીરાભાઈ પટેલ અંબાજી માતાજીના દર્શન માટે વારંવાર જતા હોવાથી, બંને બાળકોએ સ્કેટિંગ કરીને અંબાજી પહોંચવાની યાત્રાનો વિચાર રજૂ કર્યો હતો. બાળકોની તૈયારી, આત્મવિશ્વાસ અને શારીરિક ક્ષમતાને ધ્યાનમાં લઈ પરિવારજનોએ આ યાત્રાને મંજૂરી આપી જરૂરી આયોજન કર્યું હતું.
આજે સવારે 7 વાગ્યે બંને ભાઈઓ સુરતથી અંબાજી તરફ સ્કેટિંગ દ્વારા રવાના થયા હતા. સમગ્ર યાત્રા દરમિયાન સલામતી અને ઉત્સાહવર્ધન માટે દાદા સહિત પરિવારના કુલ આઠ સભ્યો ત્રણ વાહનોમાં સાથે છે. પ્રથમ જ દિવસે 75 કિલોમીટરનું અંતર પાર કરીને ભરૂચ પહોંચતા બંને બાળકોએ પોતાની સહનશક્તિ અને શિસ્તનો પરિચય આપ્યો છે.
લગભગ 480 કિલોમીટર લાંબી આ યાત્રા દરમિયાન બંને ભાઈઓ નિયમિત વિરામ, શિસ્તબદ્ધ તાલીમ અને દ્રઢ મનોબળ સાથે આગળ વધી રહ્યા છે. અંબાજી પહોંચીને માતાજીને ધ્વજા અર્પણ કરી પોતાની સ્કેટિંગ યાત્રાને પૂર્ણ કરવાનો તેમનો સંકલ્પ છે.
નાની ઉંમરમાં રમતગમત પ્રત્યેની સમર્પણભાવના અને ધાર્મિક આસ્થા સાથે શરૂ થયેલી આ અનોખી યાત્રા અનેક યુવાનો માટે પ્રેરણારૂપ બની રહી છે.