ભરૂચ
ભરૂચ શહેરના ઝાડેશ્વર રોડ પર મોપેડ અને ટેમ્પો વચ્ચે અકસ્માત સર્જાતા શખ્સને ગંભીર ઇજાઓ થઇ હતી. ઇજાગ્રસ્તને સારવાર માટે હોસ્પિટલ ખસેડવામાં આવ્યો હતો.
મળતી માહિતી મુજબ ભરૂચના ઝાડેશ્વર વિસ્તારમાં રહેતાં વસંત ભોલા જૈના (ઉ.વ. 57) મક્તમપુર જીઇબી કચેરી પાસે ચાઇનિઝની લારી ચલાવે છે. દરમિયાનમાં તે પોતાના એક્ટિવા સ્કૂટર (નંબર GJ-16-CR-0410) પર શહેરના દાંડિયાબજાર શાકમાર્કેટ વિસ્તારમાં ચાઇનિઝનો સામાન લેવા માટે ગયાં હતાં. જ્યાંથી ઘરે પરત ફરતી વખતે ઝાડેશ્વર રોડ પર તુલસીધામ ચોકડી પાસે એક નાનો હાથી ટેમ્પો (નંબર GJ-16-AW-1790) ચાલકે અચાનક બેદરકારીપૂર્વક વાહન હંકારી તેમની એક્ટિવાને ટક્કર મારી હતી.
અકસ્માતમાં વસંતભાઇ રોડ પર પડી જતા તેમના હાથ, પગ અને માથાના ભાગે ઇજાઓ પહોંચી હતી. ઘટનાની જાણ થતા આસપાસના લોકોએ તરત જ 108 એમ્બ્યુલન્સને જાણ કરી હતી. 108 એમ્બ્યુલન્સની મદદથી ઇજાગ્રસ્ત મહિલાને ભરૂચ સિવિલ હોસ્પિટલ ખાતે સારવાર માટે ખસેડવામાં આવ્યાં હતાં. ડોક્ટર દ્વારા તપાસ કરતાં મહિલાના હાથ અને પગના ભાગે ફ્રેક્ચર તથા અન્ય ઇજાઓ હોવાનું જાણવા મળ્યું હતું. આ બનાવ અંગે ટેમ્પો ચાલક સામે બેદરકારીપૂર્વક વાહન ચલાવી અકસ્માત સર્જવાના આરોપ સાથે ફરિયાદ નોંધાવવામાં આવી છે અને પોલીસે આગળની કાર્યવાહી હાથ ધરી છે.
Advertisement
