ભરૂચ:
ભરૂચ નગરપાલિકા દ્વારા હાલમાં વર્ષ ૨૦૨૬-૨૭ના ચાલુ વર્ષના મિલકતવેરાના બિલોની વહેંચણીની કામગીરી જોરશોરથી ચાલી રહી છે. મિલકતવેરાની બાકી રકમ વસૂલવા માટે પાલિકા તંત્ર દ્વારા લાલઆંખ કરવામાં આવી છે, જેના ભાગરૂપે આજરોજ વોર્ડ નં. ૧૦ ના ફાટાતળાવ વિસ્તારમાં સઘન ડ્રાઇવ હાથ ધરવામાં આવી હતી.
પાલિકાની ટીમ દ્વારા ફાટાતળાવ વિસ્તારમાં બાકી વેરા સામે કડક કાર્યવાહી કરતા છેલ્લા ૫ વર્ષથી રૂા. ૫૦,૦૦૦/- થી વધુની માતબર રકમનો વેરો ભરપાઈ ન કરનાર બે મિલકતો પર સીલિંગની કામગીરી હાથ ધરવામાં આવી હતી. આ ઉપરાંત, અન્ય મિલકતધારકોને વોરંટ બજવણી કરવાની કાર્યવાહી પણ કરવામાં આવી હતી. આ ડ્રાઇવ દરમિયાન તંત્રની કડકાઈના પગલે સ્થળ પરથી જ રૂા. ૨ લાખ કરતાં વધુની વેરાની રકમની રીકવરી કરવામાં આવી હતી.
નગરપાલિકાની આ કડક કાર્યવાહીથી વેરો ન ભરતા લોકોમાં ફફડાટ વ્યાપી ગયો છે, અને પાલિકાએ સ્પષ્ટ કર્યું છે કે આગામી દિવસોમાં પણ બાકીદારો સામે આ પ્રકારે જ સખત પગલાં લેવામાં આવશે.
