ભરૂચ જિલ્લાના નર્મદા કાંઠા વિસ્તારમાં શેરડી તેમજ કેળનું મબલક અને ગુણવત્તાસભર પાકનું ઉત્પાદન થાય છે. નર્મદા કાંઠા વિસ્તારનો પાક વિદેશોમાં પણ એક્સપોર્ટ થાય છે. નર્મદા કાંઠા વિસ્તારની ફળદ્રુપ જમીનનો બુદ્ધિપૂર્વક ઉપયોગ કરીને ખેડૂતો દ્વારા ટેકનોલોજીના ઉપયોગ સાથે મબલખ ઉત્પાદન લેવાય છે જેના અસંખ્ય દાખલાઓ જોવા મળે છે.
ભરૂચ જિલ્લાના અંકલેશ્વર તાલુકાનાં જુના દીવા ગામનાં પ્રજેશભાઈ હર્ષદભાઈ પટેલ તેનો જીવંત દાખલો છે. પ્રજેશભાઈ પટેલ દ્વારા લામ શેરડી પાકમાં રેગ્યુલર કાપણીમાં વિક્રમજનક ઉત્પાદન કરાયુ છે. પ્રજેશભાઈ પટેલ દ્વારા પીલાણ સીઝન ૨૦૧૯ માં ગુજરાતમાં સૌથી વધુ શેરડીનો સરેરાશ હેક્ટરદીઠ ૨૨૪.૭૦૨ મેટ્રિક ટન ઉપજ મેળવી ઐતિહાસિક ઉત્પાદન કર્યું છે. જુના દીવા ગામના યુવાન ખેડુત પ્રજેશભાઈ હર્ષદભાઈ પટેલને ગુજરાત રાજ્ય સહકારી ખાંડ ઉદ્યોગ સંઘ લિમિટેડ ગાંધીનગર દ્વારા સ્વ. દયારામ ભાઈ પટેલ એવોર્ડ, હેક્ટર દીઠ ઉત્પાદનની સૌથી વધુ રાશ બાબતે રાજ્યકક્ષાના મંત્રી સહકાર રમતગમત યુવા અને સાંસ્કૃતિક પ્રવૃતિઓ, વાહન વ્યવહાર ગુજરાત રાજ્યના મંત્રી ઇશ્વરસિંહ પટેલના હસ્તે ગુજરાત રાજ્ય સહકારી ખાંડ ઉદ્યોગ સંઘ લિમિટેડની ૬૦ મી વાર્ષિક સાધારણ સભા દરમિયાન આપવામાં આવ્યો હતો. આ વાર્ષિક સભામાં રાજ્યકક્ષાના મંત્રી ઇશ્વરસિંહ પટેલ, ધારીખેડા સુગરના ચેરમેન ઘનશ્યામભાઈ પટેલ સહિતના સહકારી અગ્રણીઓ ઉપસ્થિત રહ્યા હતા.
ગુલામહુશેન ખત્રી રાજપારડી જિ.ભરૂચ
