ભરૂચ જિલ્લામાં કોરોનાનું સંક્રમણ દિન પ્રતિદિન વધી રહ્યું છે, શહેરી વિસ્તારની સાથે સાથે હવે ગ્રામ્ય વિસ્તારોમાં પણ કોરોનાનાં કેસોએ માથું ઊંચક્યું છે, વધતા જતા કેસો સામે હવે જિલ્લાના ગ્રામ્ય વિસ્તારોમાં સતર્કતા દાખવવામાં આવી રહી છે, જિલ્લાના અનેક તાલુકા લેવલે રોજિંદા કાર્યના સમયમાં ઘટાડો કરવામાં આવ્યો છે.
ભરૂચ જિલ્લાના નેત્રંગ ખાતે ગ્રામપંચાયત, તાલુકા પંચાયત અને વેપારી એસોસિયેશન દ્વારા વધતા કેસો સામે સ્વયંભૂ લોકડાઉનનો નિર્ણય કરવામાં આવ્યો છે જેમાં આજથી ચાર દિવસ સુધી જીવન જરૂરિયાતની વસ્તુઓને બાદ કરતાં તમામ ધંધા રોજગાર બંધ પાડવાનો નિર્ણય લેવામાં આવ્યો છે, જેના ભાગરૂપે આજે નેત્રંગમાં સન્નાટો જોવા મળ્યો હતો.
મહત્વની બાબત છે કે જિલ્લાના અનેક સ્થળોએ સ્વયંભૂ લોકડાઉન તેમજ બપોર સુધી જ ધંધા રોજગાર શરૂ રાખવામાં આવી રહ્યા છે અને કોરોનાનાં વધતા સંક્રમણને રોકવા માટે હવે લોકો સ્વયં જાગૃતા દર્શાવી રહ્યા છે જે આ મહામારીના સમયમાં સરાહનીય બાબત કહી શકાય તેમ છે.
