અંકલેશ્વર તાલુકાના પીરામણ ગામ ખાતે ફૂટબોલ ટૂર્નામેન્ટનું આયોજન કરાયું હતું જેમાં 16 ટીમોએ ભાગ લીધો હતો. આ સ્પર્ધાની ફાઇનલ મેચ નબીપુર અને કોસમડીની ટીમો વચ્ચે રમાઈ હતી. આ મેચ ખૂબ જ દિલધડક તબક્કામા પહોંચી હતી. બંને ટીમો વચ્ચે બરાબરનો મુકાબલો જામ્યો હતો. અંતે આ મુકાબલો નબીપુરની ટીમે 1 વિરુદ્ધ 0 ગોલથી જીતી લીધો હતો.
ફાઇનલ સહિત સમગ્ર ટુર્નામેન્ટમાં નબીપુરના ગોલકીપર સાહિલ ધોકલિયાએ સુંદર કામગીરી બજાવી હતી જેથી તેમને બેસ્ટ ગોલકીપર ઓફ ધ ટૂર્નામેન્ટનો એવોર્ડ અપાયો હતો. આયોજકો તરફથી વિજેતા ટીમના દરેક ખેલાડીઓને મેડલો અપાયા હતા. અત્રે એ ઉલ્લેખનીય છે કે નબીપુર ટીમના કેપટન સલમાન ઘાસવાળાની આગેવાનીમાં આ વર્ષે આ ત્રીજી ટ્રોફી જીતી છે. અગાઉ બેવાર અંકલેશ્વર તાલુકાના ખરોડ ખાતે યોજાયેલ ટૂર્નામેન્ટ જીતી હતી. આ જીતથી નબીપુર ગામમાં ખુશીનું મોજું ફરી વર્યું છે અને વિજેતા ટીમનું ગામમાં ભવ્ય સ્વાગત કરાયું છે.
યાકુબ પટેલ, પાલેજ
