બનાવ અંગેની પ્રાપ્ત માહિતી અનુસાર ભરૂચ જિલ્લાના વાગરા તાલુકના દહેજ જીઆઇડીસી વિસ્તારમાં આવેલ મેઘમણી ઓર્ગેનિક કંપનીના વેર હાઉસમાં ગત મોડી રાત્રીના સમયે અચાનક આગ ફાટી નીકળતા કંપનીમાં કામ કરતા કર્મચારીઓમાં ભારે નાસભાગ મચી હતી, કંપનીના વેર હાઉસમાં લાગેલ આગે જોત જોતામાં વિકરાળ સ્વરૂપ ધારણ કરતા આસપાસ વિસ્તારના લોકોમાં પણ એક સમયે ધભરાટનો માહોલ છવાયો હતો.
મેઘમણી ઓર્ગેનિકમાં લાગેલ આગની ઘટના અંગેની જાણ ફાયર વિભાગમાં કરવામાં આવતા ફાયર વિભાગના ૫ થી વધુ લાયબંબા ઘટના સ્થળે પહોંચ્યા હતા અને આગ ઉપર પાણીનો મારો ચલાવી તેને કાબુમાં લેવાના પ્રયત્નો શરૂ કર્યા હતા,જોકે ભારે જહેમત અને કલાકોની મહેનત બાદ ફાયરના કર્મીઓને આગને કાબુમાં લેવામાં સફળતા મળી હતી. ઘટના અંગેની જાણ દહેજ પોલીસ મથકે થતા પોલીસનો કાફલો પણ સ્થળ ઉપર દોડી ગયો હતો,અને કર્મચારીઓને સલામત સ્થળે ખસેડવાની કામગીરી શરૂ કરી હતી.
હાલ કંપનીમાં આગ કયા કારણોસર લાગી હતી તે અંગે હજુ સુધી સ્પષ્ટતા થઇ શકી નથી. જોકે આગમાં કંપનીના વેરહાઉસ સહિતના વિસ્તારોમાં મોટું નુકસાન થયું હોવાનું અનુમાન લગાવાઈ રહ્યું છે, જોકે સમગ્ર ઘટના ક્રમમાં સદનસીબે કોઈ પણ પ્રકારની જાનહાની ન થતા ઉપસ્થિત કર્મચારીઓ અને લોકો એ રાહતનો શ્વાસ લીધો હતો.
