ભરૂચ જિલ્લાના નેત્રંગ ખાતે સ્વચ્છતા અભિયાનની ઉલ્ટી ગંગા વહેતી હોય તેવા દ્રશ્યો સામે આવતા જોવા મળી રહ્યા છે, જ્યાં ગ્રામ પંચાયતની દીવાલને અડીને જ ગંદકીનું સામ્રાજ્ય જામ્યું હોય તેવી સ્થિતિનું સર્જન થયું છે.
સમગ્ર ગામમાં કચરો અને ગંદકી ન રહે તે માટેની જવાબદારી ગામ પંચાયતની હોય છે, પરંતુ નેત્રંગ ગામ પંચાયત બહારના આ પ્રકારના ગંદકીમય દ્રશ્યો આજ કાલ લોકો વચ્ચે પણ ચર્ચાનું કેન્દ્ર બન્યા છે,સાથે જ વિસ્તારમાં કચરો ઉઠાવવા માટે લાખોના ખર્ચે સરકાર દ્વારા આપવામાં આવેલ કચરો ઉઠાવવાની સાયકલો પણ ભંગાર હાલતમાં ધૂળ ખાતી નજરે પડી રહી છે,ત્યારે નેત્રંગ ગામ પંચાયતના અંધેર વહીવટના કારણે હાલ આ વિસ્તારમાં તહેવારોના સમયમાં પણ ગંદકીનું સામ્રાજ્ય પ્રસરેલું નજરે પડી રહ્યું છે.
હાલ તો આ પ્રકારની સામે આવેલ સ્થિતિ બાદ જાગૃત નાગરિકો પંચાયત પાસે આશાઓ અને અપેક્ષાઓ સેવી રહ્યા છે કે આ પ્રકારની ગંદકીમય સ્થિતિને તંત્ર સુધારે અને નેત્રંગને સ્વચ્છ અને સુંદર બનાવવાની નેમ સાથે લાગતા વળગતા કર્મીઓ કામ કરે તેવી લોક માંગ ઉઠવા પામી છે.
