ભુલાઇ ગયેલો મોબાઇલ લેવા જતાં કારની ટક્કરે આધેડનું મોત

ગલેન્ડાની લેવેન્સ લેબ કંપની સામે બનેલી ઘટના
ભરૂચ.
અંક્લેશ્વરના ગોલ્ડન પોઇન્ટ ખાતેરહેતાં નીરવ રજની વઘાસિયા લેવન્સ કંપનીમાં પ્રોડક્શન એક્ઝિક્યુટીવ તરીકે નોકરી કરે છે. તેઓ ગઇકાલે જનરલ શિફ્ટમાં કંપનીનો બસમાં નોકરીએ ગયાં હતાં. તેમની સાથે મનુબર ચોકડીથી શબ્બીર અહમદ ઉભરાટદાર(રહે. બાવા રેહાનનગર, વેજલપુર) પણ બસમાં બેઠાં હતાં. તેઓએ નોકરીમાં અંદર જતાં પહેલાં તેમના મોબાઇલ કંપનીના ગેટ પર જમા કરાવ્યાં હતાં. સાંજે નોકરી પુર્ણ થતાં તેઓ પરત આવવા માટે પુન: તેમની કંપનીની બસમાં બેઠાં હતાં. દરમિયાનમાં શબ્બીર ઉભરાટદારને ધ્યાનમાં આવ્યું હતું કે, તેઓ તેમનો મોબાઇલ ભુલી ગયાં છે. જેથી તેમણે બસ ઉભી રખાવી બસમાંથી ઉતરી કંપનીના ગેટ પર પોતાનો મોબાઇલ લેવા જઇ રહ્યો હતો. તે વેળાં ડેરામિક કંપની તરફથી આવતી એક સફેદ કલરની કારના ચાલકે શબ્બીરભાઇને ટક્કર મારતાં તેમને ગંભીર ઇજાઓ થતાં તેમને પ્રાઇવેટ કારમાં ખાનગી હોસ્પિટલમાં લઇ ગયાં હતાં. જ્યાં તબીબે તપાસ કરતાં તેમના માથામાં ગંભીર ઇજાઓ થવાને કારણે તેમનું મોત નીપજ્યું હોવાનું જણાવ્યું હતું. બનાવને પગલે દહેજ પોલીસે ગુનો નોંધી આગળની કાર્યવાહી હાથ ધરી છે.