10 દિવસમાં પાણી નહીં મળે તો ભરૂચ-દહેજ રોડ પર રસ્તા રોકો આંદોલન કરવાની ચીમકી
ભરૂચ.
વાગરા તાલુકાના વેંગણી ગામમાં પીવાના પાણી માટે લોકો વલખાં મારી રહ્યાં છે. છેલ્લાં કેટલાંય વર્ષોથી ગ્રામજનો પીવાના પાણીની તંગી વેઠી રહ્યાં છે. લોકોને ગામમાં બોરનું પાણી પીવું પડી રહ્યું છે. જેના કારણે લોકોને કામય રોગચાળાનો ભોગ બનવું પડી રહ્યાં છે. નળ સે જળ યોજનામાં જ્યાં દરેક ગામમાં પાણી પહોંચાડવાની જાહેરાતો કરવામાં આવી રહી છે. ત્યારે આ યોજના હેઠળ હજી સુધી તેમના ગામમાં પાણી અપાયું નથી. ત્યારે સોમવારે ગ્રામજનોએ મોટી સંખ્યામાં કલેક્ટર કચેરીએ પહોંચી ગામમાં પાણી મળી રહે તે માટેની રજૂઆત કરી હતી. ઉપરાંત જો 10 દિવસમાં પાણી નહીં મળે તો આગામી દિવસોમાં ભરૂચ-દહેજ રોડ પર આખું ગામ ઉતરી આવશે અને વાહન વ્યવહાર બંધ કરી રસ્તા રોકો આંદોલન કરવામાં આવશે તેવી ચીમકી આપી હતી.
કલેક્ટર કચેરીના વેટીંગ રૂમમાં જ પાણી નહીં
વેંગણી ગામમાંથી મોટી સંખ્યામાં મહિલાઓ સહિતના ગ્રમજનો કલેક્ટર કચેરીએ પહોંચતાં આવેદન આપવા જતી વેળાં મુખ્ય આગેવાનોને જ કચેરીમાં જવા દીધાં હતાં. જોકે, બાકીના લોકો વેટીંગ રૂમ પાસે બેઠાં હતાં. દરમિયાનમાં તેઓને તરસ લાગતાં ત્યાં મુકેલાં કુલર પર જતાં ત્યાં પાણી જ નહીં હોવાથી તેઓએ રોષ વ્યક્ત કર્યો હતો. કલેક્ટર કચેરીમાં વેટીંગ રૂમમાં જ જ્યારે પાણી નથી આપી શકતું તો ગામ સુધી ક્યારે પહોંચાડશે તેવી ટકોર મહિલાઓએ કરી હતી.
