ભરૂચ
ભરૂચ શહેરમાં વરસાદી માહોલ જાગ્યો છે ત્યારે બુધવારે વિચિત્ર ઘટના સામે આવી છે. શહેરના શેરપુરા વિસ્તારમાં વરસાદ બાદ પાણીથી ભરાયેલા ખાબોચિયાઓમાં પીળા રંગના દેડકાઓ દેખાતા આસપાસના વિસ્તારમાં રહેતા લોકો તે જોવા માટે ઉમટી પડયા હતા. પીળા રંગના દેડકા ક્યાંથી આવ્યા તેને લઈને લોકોમાં અનેક તર્કવિર્તક ચાલી રહ્યા હતા. બીજી તરફ કેટલાક લોકો આને કુદરતની એક કમાલ ગણાવી રહ્યા હતા. અત્રે ઉલ્લેખનીય છે કે, સામાન્યત: દેડકાની આ પ્રજાતિને ભારતીય બુલફ્રોગ તરીકે ઓળખવામાં આવે છે. આ પ્રજાતિમાં નર દેડકા પત્થરીયા કલર જેવા હોય છે પરંતુ વરસાદમાં પ્રજનનની સીઝનમાં તેઓ પીળા રંગના બની જાય છે અને આ દેડકા સામાન્ય: હાનિકારક હોતા નથી જો કે આવા દેડકાની સંખ્યા અચાનક વધી જાય તો પર્યાવરણીય બદલાવ તેનું કારણ હોઈ શકે તેમ માનવામાં આવે છે. અલબત્ત હાલમાં તો પીળા રંગના દેડકાને જોવા માટે લોકોની ભીડ જામી રહી છે.
