પાવીજેતપુર તાલુકાના રતનપુર ગામે રોડ ઉપર બે બાઈકો સામસામે અથડાતા એક યુવાનનું કરુણ મોત પાવીજેતપુર તાલુકાના રતનપુર ગામે સવારના સમયે રોડ ઉપર બે બાઇકો સામસામે અથડાતા એક યુવાનને ગંભીર ઇજાઓ થતાં સારવાર માટે લઈ જતા રસ્તામાં કરુણ મોત થવા પામ્યું છે.
પ્રાપ્ત માહિતી મુજબ પાવીજેતપુર તાલુકાના ચુડેલ ગામના રહીશો રાજુભાઈ ગગજીભાઇ ભરવાડ તથા વિક્રમભાઈ નટુભાઈ રાઠવા પાવીજેતપુરથી પોતાના ઘરે ચુડેલ ગામે જઇ રહ્યા હતા ત્યારે રતનપુર હનુમાનજીના મંદિર પાસે રોડ ઉપર સામસામે ધડાકાભેર બે બાઇકો અથડાઈ હતી. ભયંકર રીતે બે બાઈક અથડાતા રાજુભાઈ ગગજીભાઇ ભરવાડ ( ઉંમર વર્ષ ૩૩ ) ને માથાના ભાગે, જમણા પગે પંજાના ભાગે, જમણા હાથે ખભા ઉપર ગંભીર ઇજાઓ થતા તાત્કાલીક તેઓને સારવાર માટે ૧૦૮ માં દવાખાને લઈ જવામાં આવતા હતા. સારવાર માટે લઇ જવાતા રસ્તામાં તેઓનું મોત નિપજ્યું હતું, જ્યારે વિક્રમભાઈ નટુભાઈ રાઠવાને સાધારણ ઈજાઓ પહોંચી હતી. પાવીજેતપુર તાલુકાના રતનપુર રોડ ઉપર બે બાઈકો સામસામે અથડાતા થયેલા અકસ્માતમાં ચુડેલના યુવાનનું કરુણ મોત થયું હતું જે અંગે ગુનો નોંધી પાવીજેતપુર પોલીસ વધુ તપાસ ચલાવી રહી છે.
ફૈજાન ખત્રી જિ.છોટાઉદેપુર
