ઇઝરાયેલની સેનાએ સોમવારે સીરિયાની રાજધાનીમાં ઈન્ટરનેશનલ એરપોર્ટ પર અનેક મિસાઈલોથી હુમલો કર્યો, જેમાં બે સૈનિકોના મોત થયા હતા અને અન્ય બે ઘાયલ થયા હતા. મિસાઈલ હુમલા બાદ એરપોર્ટને બંધ કરી દેવામાં આવ્યું છે. સીરિયાની સેનાએ આ જાણકારી આપી છે. સેનાએ કહ્યું કે સાત મહિનાની અંદર દમાસ્કસ ઈન્ટરનેશનલ એરપોર્ટને નિશાન બનાવીને કરવામાં આવેલો આ બીજો હુમલો હતો, જેના પછી એરપોર્ટને બંધ કરવું પડ્યું. આ હુમલાથી આસપાસના વિસ્તારને પણ નુકસાન થયું છે. એક યુદ્ધ મોનિટરિંગ સંસ્થાએ પોતાના રિપોર્ટમાં કહ્યું કે ઇઝરાયેલની મિસાઈલો એરપોર્ટ અને સેનાના શસ્ત્રાગાર પર પડી.
બ્રિટનની ‘સીરિયન ઓબ્ઝર્વેટરી ફોર હ્યુમન રાઇટ્સ’એ જણાવ્યું કે આ હુમલામાં ચાર લોકો માર્યા ગયા છે. ઇઝરાયેલે હજુ સુધી આ અંગે કોઈ પ્રતિક્રિયા આપી નથી. ઉલ્લેખનીય છે કે, 10 જૂનના રોજ ઇઝરાયેલના હવાઈ હુમલામાં દમાસ્કસ ઈન્ટરનેશનલ એરપોર્ટને ખરાબ રીતે નુકસાન થયું હતું. ઇઝરાયેલે તાજેતરના વર્ષોમાં સીરિયામાં સરકાર હસ્તકના સ્થાનોને નિશાન બનાવીને અનેક હુમલા કર્યા છે, પરંતુ આ હુમલાઓની જવાબદારી ક્યારેય જાહેરમાં સ્વીકારી નથી.
ઇઝરાયેલે દમાસ્કસ ઈન્ટરનેશનલ એરપોર્ટ પર એર સ્ટ્રાઇક અંગે ટિપ્પણી કરી નથી. એક વર્ષથી ઓછા સમયમાં દમાસ્કસ ઈન્ટરનેશનલ એરપોર્ટને મુસાફરો માટે બંધ કરવામાં આવ્યું હોય તેવું આ બીજી વખત હતું. 10 જૂનના રોજ, દમાસ્કસ ઇન્ટરનેશનલ એરપોર્ટ પર ઇઝરાયેલના હવાઇ હુમલાથી ઇન્ફ્રાસ્ટ્રક્ચર અને રનવેને નોંધપાત્ર નુકસાન થયું હતું. સમારકામના બે અઠવાડિયા પછી તેને ફરીથી ખોલવામાં આવ્યું હતું.
જણાવી દઈએ કે, 2021 ના અંતમાં પણ ઇઝરાયેલના યુદ્ધ વિમાનોએ સીરિયા પર મિસાઈલ છોડી હતી. આ હુમલામાં લતાકિયા બંદરને ઘણું નુકસાન થયું હતું. ઇઝરાયેલે તાજેતરના વર્ષોમાં સીરિયાના સરકાર-નિયંત્રિત ભાગોમાં સેંકડો હુમલાઓ કર્યા છે પરંતુ ક્યારેય તેની પુષ્ટિ કરી નથી.
