જૂનાગઢમાં રાતે ખાનગી કોલેજની બસમાં આગ ભભૂક્તા અફરાતફરી મચી.

જૂનાગઢમાં મોડી રાતે દાતાર રોડ ઉપર સર્વિસ માટે આવેલ કોલેજની એક બસમાં અચાનક જ આગ ભભૂકી ઉઠતા લોકોના ટોળે ટોળા ત્યાં ઉમટી પડ્યા હતા. આગ વધુ ન પ્રસરે તે માટે આસપાસના લોકો અને ફાયર સ્ટાફ ઘટના સ્થળે દોડી ગયો હતો. જુનાગઢ શહેરમાં દાતારોડ થી ગિરનાર દરવાજા તરફ જતા રોડ પર આવેલ ખોડીયાર સર્વિસ સ્ટેશનમાં સર્વિસ માટે આવેલી એક કોલેજની બસમાં કોઈપણ કારણોસર અચાનક જ આગ લાગી હતી. આગે જોત જોતામાં વિકરાળ સ્વરૂપ ધારણ કરતા આખી બસ આગની લપેટમાં આવી ગઈ હતી ત્યારે આસપાસના રહીશો અને નજીકના લોકોએ આગ વધુ ન પ્રસરે તે માટે સર્વિસ સ્ટેશનનો ગેઈટ ખોલીને અંદર પહોંચ્યા અને નજીકમાં જ આવેલ ફાયર સ્ટાફ ની બે ટીમ દ્વારા આગને કાબુમાં લેવા કામગીરી શરૂ કરી હતી. ઘટનાને લઈને દાતાર રોડથી ગિરનાર રોડ સુધી લોકોના ટોળેટોળા ઉમટી પડ્યા હતા અને ટ્રાફિક જામ જેવી સ્થિતિ જોવા મળી હતી સદનસીબે અન્ય કોઈ બિલ્ડીંગ કે અન્ય કોઈ વાહનમાં આગ નથી લાગી કે કોઈને જાનહાનિ થયેલ નથી