હાલમાં ટીવી પર સાસ-બહુની સિરિયલોનું રાજ ખતમ, હવે ધાર્મિક સિરિયલોની બોલબાલા.

હાલમાં કોરોનાને લઈ દેશમાં લોકડાઉન ચાલી રહ્યું છે ત્યારે ટીવી શોની ટી.આર.પી રેટિંગમાં જોરદાર બદલાવ જોવા મળ્યો છે. સ્ટાર પ્લસની સીરિયલ મહાભારત હાલ નંબર વન શો બની ગયો છે. હાલ ટીવી પર બે ચેનલો પર ચાલી રહેલી રામાયણ વચ્ચે પણ જોરદાર ટક્કર જોવા મળી રહી છે. કુલ મળીને જોઈએ તો ટોપ-ટેનનાં લીસ્ટમાં માત્રને માત્ર ધાર્મિક શોનાં નામ જ સામેલ છે. આ સપ્તાહે પહેલા નંબર પર મહાભારત છે. સિદ્ધાર્થકુમાર તીવારીની આ મહાભારત લોકોની પહેલી પસંદ બની છે. પાછલા સપ્તાહે આ શો બીજા નંબરે હતો. રિપિટ ટેલિકાસ્ટમાં નંબર વન બનીને પોતાની છાપ છોડવી શો નાં નિર્માતા માટે આનંદની વાત છે. ડીડી નેશનલ પર પ્રસારિત થઈ રહેલી શ્રી કૃષ્ણા બીજા નંબરે છે. પાછલા સપ્તાહે આ શો નંબર વન હતો. જ્યારે ત્રીજા નંબરે રામાનંદ સાગરની રામાયણ છે જે સ્ટાર પ્લસ પર ટેલીકાસ્ટ થઈ રહી છે. અત્યારે આ સિરિયલમાં રામ-રાવણ વચ્ચે યુદ્ધ ચાલી રહ્યું છે. ચોથા નંબરે દંગલનો શો મહિમા શનિદેવ કી છે. રામાયણ, શ્રીકૃષ્ણા અને મહાભારત જેવા શો વચ્ચે શનિદેવ પણ ટોપ-ટેનની યાદીમાં છવાયેલા છે. પાંચમા નંબરે દંગલની રામાયણ છે. અત્યારે ગુરમીત ચૌધરી અને દેબીના બેનર્જીની રામાયણમાં પણ રામ-રાવણના યુદ્ધની શરૂઆત થઈ રહી છે. આ શોને પણ ઘણો પસંદ કરાઈ રહ્યો છે. આ સપ્તાહે ધ્યાન આપવા જેવી વાત એ છે કે કોઈપણ સાસ-વહુની સિરિયલને ટોપ-ટેનમાં સ્થાન મળ્યું નથી. અત્યારે ધાર્મિક શોની જ બોલબાલા જોવા મળી રહી છે.