લાંબા સમય પછી ફરી એકવાર છેલ્લા બે દિવસથી ઉપરવાસમાં પાણીની આવક વધતા કરજણ ડેમમાં પાણીની આવક વધતા કરજણ ડેમના બે દરવાજા ખોલાયા છે. તેમાંથી ૨,૪૪૨ ક્યુસેક પાણીની આવક સામે એટલા જ ૨,૪૪૨ ક્યુસેક જાવક નોંધાઈ છે. હાલ કરજણ ડેમની જળ સપાટી ૧૧૨.૫૬ મીટરે નોંધાઇ છે.
કરજણ ડેમના કાર્યપાલક ઇજનેરે જણાવ્યું હતું કે, નર્મદા જિલ્લામાં જીતગઢ ગામ નજીક આવેલ કરજણ બંધના ઉપરવાસમાં આવેલા સ્ત્રાવ વિસ્તારમાં ૭૦ મી.મી. જેટલો વરસાદ નોંધાતા આજે ડેમની જળ સપાટી ૧૧૨.૫૬ મીટરે નોંધાઇ હતી. આજનું રુલ લેવલ જાળવવા કરજણ જળાશયમાંથી અંદાજે ૨,૪૪૨ ક્યુસેક પાણીના ઇન્ફલો સામે ૨ (બે) દરવાજા મારફત હાલમાં ૨,૪૪૨ ક્યુસેક પાણીની જાવક કરેલ છે. અત્રે ઉલ્લેખનીય છે કે, કરજણ જળાશયમાંથી સરેરાશ ૩૮૮ ક્યુસેક ડિસ્ચાર્જ પાણીના પ્રવાહની જાવકથી પ્રતિદિન ૭૨ હજાર યુનિટનું વિજ ઉત્પાદન થઇ રહ્યું છે.
કરજણ ડેમ હાલમાં ૮૦ ટકા સ્ટેજ પર હોઈ તથા ડેમમાંથી છોડાઇ રહેલા પાણીના કારણે નદી કાંઠાના વિસ્તારોના રાજપીપલા શહેર, ભદામ, ભચરવાડા, હજરપરા, ધાનપોર અને ધમણાછા ગમોના લોકો/રહીશોને નદી કિનારાથી દૂર રહેવા અને પશુધનને દૂર રાખવા સાથે સાવધ રહેવા માટે જિલ્લા વહિવટીતંત્ર દ્વારા સાવચેત કરવામાં આવ્યાં છે.
દીપક જગતાપ, રાજપીપળા
