રાજસ્થાનમાં એક મોટી રેલ દુર્ઘટના ઘટી છે. પાલી જિલ્લામાં ટ્રેન નં. 12480 બાંદ્રા ટર્મિનસ-જોધપુર સૂર્યનગરી એક્સપ્રેસ ટ્રેનના 13 ડબ્બા પાટા પરથી ઉતરી ગયા છે. આ અકસ્માત આજે સવારે 3.27 કલાકે થયો હતો. જણાવવામાં આવી રહ્યું છે કે જોધપુર ડિવિઝનના રાજકિયાવાસ-બોમદરા સેક્શન વચ્ચે ટ્રેનના ડબ્બા પાટા પરથી ઉતરી ગયા હતા. માહિતી અનુસાર, અકસ્માતમાં ઘાયલ થયેલા 21 મુસાફરોને બાંગર હોસ્પિટલમાં સારવાર આપવામાં આવી રહી છે. રાહત બચાવ કામગીરી ચાલી રહી છે. ક્ષતિગ્રસ્ત ટ્રેનના ડબ્બા સિવાય સુરક્ષિત ડબ્બા ટ્રેનને ગંતવ્ય સ્થાને રવાના કરવામાં આવી છે. ઈજાગ્રસ્ત મુસાફરોને બસ અથવા અન્ય કોઈ ટ્રેન દ્વારા મોકલવામાં આવશે. રેલવે તંત્ર દ્વારા ઘાયલ મુસાફરોને વળતર પણ આપવામાં આવશે. રેલવે મંત્રી અશ્વિની વૈષ્ણવ ઘટનાસ્થળે પહોંચે તેવી શક્યતા છે. અકસ્માત બાદ 12 ટ્રેનોના રૂટ બદલવામાં આવ્યા છે.
ઉત્તર પશ્ચિમ રેલ્વેના સીપીઆરઓ કેપ્ટન શશિ કિરણે જણાવ્યું કે આજે લગભગ 3:30 વાગ્યે માહિતી મળી કે સૂર્યનગરી એક્સપ્રેસના કેટલાક કોચ રાજકિયાવાસ અને બોમદરા વચ્ચે પાટા પરથી ઉતરી ગયા છે. આ દુર્ઘટનામાં લગભગ 11 કોચને અસર થઈ છે, પરંતુ હજુ સુધી કોઈ જાનહાનિની માહિતી મળી નથી. ઉચ્ચ અધિકારીઓ ઘટના સ્થળે પહોંચી ગયા છે.
સીપીઆરઓ કેપ્ટન શશિ કિરણે જણાવ્યું કે રેલવે વિભાગે મુસાફરો અને તેમના સંબંધીઓ માટે હેલ્પલાઇન નંબર જારી કર્યો છે. જોધપુરનો હેલ્પલાઇન નંબર 02912654979, 02912654993, 02912624125, 02912431646 છે જ્યારે પાલીનો હેલ્પલાઇન નંબર 02932250324 છે. મુસાફરો અને તેમના સંબંધીઓ આ નંબરો પર ફોન કરીને માહિતી મેળવી શકે છે. CPROએ જણાવ્યું કે મુસાફરો અને તેમના સંબંધીઓ 138 અને 1072 હેલ્પલાઇન નંબર પર પણ કોલ કરી શકે છે.
દુર્ઘટના સમયે ટ્રેનમાં સવાર એક મુસાફરે જણાવ્યું કે મારવાડ જંક્શન છોડ્યાની 5 મિનિટમાં જ ટ્રેનની અંદર જોરદાર કંપનનો અવાજ સંભળાયો અને 2-3 મિનિટ પછી ટ્રેન ઊભી અટકી ગઈ. અમે નીચે ઉતરીને જોયું કે ઓછામાં ઓછા 8 સ્લીપર ક્લાસ કોચ પાટા પરથી ઉતરી ગયા હતા. 15-20 મિનિટમાં એમ્બ્યુલન્સ આવી ગઈ.
માહિતી અનુસાર, એમ્બ્યુલન્સ ઘટનાસ્થળે પહોંચી ગઈ અને ઘાયલોને હોસ્પિટલમાં લઈ જવામાં આવી રહ્યા છે. બે કોચને જોડતો હૂક તૂટવાને કારણે આ અકસ્માત થયો હોવાની વાત જાણવા મળી છે. હાલમાં નજીકની હોસ્પિટલોને એલર્ટ પર રાખવામાં આવી છે.
