સુરતમાં ફરી એકવાર રખડતાં ઢોરનો આતંક સામે આવ્યો છે. નવાગામ ડીંડોલી વિસ્તારમાં ચાલુ ટુ-વ્હીલરને રખડતા ઢોરે અડફેટે લેતા પાછળની સીટ પર બેસનારી મહિલા રોડ પર પટકાઇ હતી અને તેને ઇજાઓ પહોંચી હતી. આ સમગ્ર ઘટનાના સીસીટીવી ફૂટેજ પણ સામે આવ્યા છે. ઉલ્લેખનીય છે કે, છેલ્લા ઘણા સમયથી શહેરમાં રખડતાં ઢોરના કારણે રાહદારીઓ અને વાહનચાલકોને ભારે હાલાકીનો સામનો કરવો પડી રહ્યો છે. ત્યારે પશુપાલકોની દાદાગીરી અને કોર્પોરેશનની ઢીલી નીતિને કારણે આ સમસ્યા હાલ પણ યથાવત છે.
સુરતના નવાગામ ડીંડોલી વિસ્તારમાંથી ટુ-વ્હીલર પર પાછળની સીટ પર બેસનારી એક મહિલાને એકાએક રખડતા ઢોરે અડફેટે લાધી હતી. આથી મહિલા રોડ પર પટકાય છે, જેના કારણે મહિલાને ઇજાઓ થાય છે. આ ઘટના બનતા આજુબાજુના લોકો દોડી આવ્યા હતા અને ઇજાગ્રસ્ત મહિલાની મદદ કરી હતી. અતિ વ્યસ્ત વિસ્તારમાં બનેલા આ બનાવ બાદ અન્ય વાહનચાલકોમાં પણ ડરનો માહોલ જોવા મળ્યો હતો.
