સુરતની સિવિલ હોસ્પિટલ ધણી વખત વિવાદોમાં સપડાઈ છે. ત્યારે હવે એક નવો વિવાદ સામે આવ્યો છે, જેમાં સુરતની સિવિલ હોસ્પિટલમાં સ્ટ્રેચર ન મળતા દર્દીઓ અને તેમના સગાંઓને ભારે હાલાકીનો સામનો કરવો પડ્યો છે. હોસ્પિટલના કિડની વિભાગની બિલ્ડિંગમાં સગાઓએ દર્દીઓને ઉંચકીને લઈ જવાનો વારો આવ્યો હતો. આ ઘટનાનો એક વીડિયો પણ સામે આવ્યો છે, જેને લઈ ચર્ચાઓ થઈ રહી છે.
તાજેતરમાં સુરતની સિવિલ હોસ્પિટલમાં કોન્ટ્રાક્ટના કર્મીઓની ગેરહાજરી સાથે સ્ટ્રેચરની પણ કમી જોવા મળી હતી, જેના કારણે દર્દીઓના સંબંધીઓ દર્દીને ઉંચકીને હોસ્પિટલમાં લઈ જતા જોવા મળ્યા હતા. સુરતની સિવિલ હોસ્પિટલના કિડની વિભાગની બિલ્ડિંગનો એક વીડિયો સામે આવ્યો છે, જેમાં સ્ટ્રેચર ન મળતા એક મહિલા દર્દીને તેમના સગાં ઊંચકીને હોસ્પિટલમાં લઈ જાય છે. સ્ટ્રેચરના અભાવે દર્દી અને સગાંઓને ભારે મુશ્કેલીનો સામનો કરવો પડી રહ્યો હતો.
કેટલાક લોકોનું કહેવું છે કે સ્ટ્રેચર તો દૂર પણ દર્દીઓ માટે વ્હીલચેર પણ નહોતી. આ અંગે હોસ્પિટલ સ્ટાફને પૂછતા કોઈએ સરખો જવાબ પણ આપ્યો નહોતો. હોસ્પિટલમાં આ સ્થિતિને જોઈ લોકોમાં રોષ જોવા મળી રહ્યો છે. જ્યારે હોસ્પિટલ તંત્રની કામગીરી સામે પણ કેટલાક સવાલ ઊભા થઈ રહ્યા છે.
