વડોદરા જિલ્લાના ડભોઈ તાલુકામાં એક ગમખ્વાર અકસ્માતમાં બાઇકસવાર યુવકનું કમકમટીભર્યું મોત નીપજ્યું હતું. મોડી રાતે પૂરઝડપે આવતા એક ટેમ્પોચાલકે બાઇકસવાર યુવકને અડફેટે લેતા તે હવામાં ફંગોળાઈને નીચે પટકાયો હતો, આથી તેણે માથાના ભાગે ગંભીર ઇજાઓ થતા તેનું ઘટના સ્થળે જ મોત નીપજ્યું હતું. આ મામલે ડભોઇ પોલીસે ફરાર ટેમ્પોચાલક વિરુદ્ધ ગુનો નોંધીને આગળની કાર્યવાહી હાથ ધરી છે.
મળતી માહિતી મુજબ, વડોદરા જિલ્લાના ડભોઈ તાલુકાના ફરતીકુઇ ગામ પાસે મોડી રાતે એક બાઇકસવાર યુવક પસાર થઈ રહ્યો હતો. દરમિયાન પૂરઝડપે આવતા એક ટેમ્પો ચાલકે બાઇકસવાર યુવકને ધડાકાભેર ટક્કર મારી હતી. આથી યુવક હવામાં ફંગોળાઈને નીચે પટકાયો હતો, જેથી તેના માથાના ભાગે ગંભીર ઇજાઓ થતા તેનું ઘટના સ્થળે જ મોત નીપજ્યું હતું. આ અકસ્માતને પગલે લોકોની ટોળું ભેગું થયું હતું. જ્યારે ટેમ્પોચાલક અકસ્માત સર્જીને ફરાર થઈ ગયો હતો.
આ મામલે ડભોઈ પોલીસને જાણ કરવામાં આવી હતી. પોલીસની ટીમ ઘટના સ્થળે પહોંચી અને મૃતક યુવકનો મૃતદેહ પીએમ અર્થે મોકલી આપ્યો હતો. જ્યારે ફરાર ટેમ્પોચાલક વિરુદ્ધ ગુનો નોંધીને તેની શોધખોળ આદરી છે. મૃતક યુવકની ઓળખ હજી સુધી સામે આવી નથી. પોલીસ આ મામલે વધુ તપાસ કરી રહી છે.
